Çështja “Bonuçi”, Juvja fut në lojë pesë lojtarë
"Jetoj për golat, dua vetëm t'ia shpërblej klubit"
Një vit më parë, duke shfrytëzuar mundësinë në miqësore, niste ngjitja në karrierë për Patrik Kutrone. Nga grumbullimi amerikan i kuqezinjve, sulmuesi ka folur për 365 ditët te Milani dhe objektivat sezonale.
Patrik, përpara një viti në një turne veror niste shpërthimi juaj, si ndiheni?
Nga Kina kam kujtime shumë të bukura, sidomos në një takim kundër Bajernit, kur shënova një dygolësh. Edhe në ditë pasardhëse nuk më besohej ajo që kisha bërë, ishte një ndeshje e paharrueshme.
Si e gjykoni sezonin tuaj të parë mes profesionistëve?
Kur isha i grumbulluar me ekipin e parë gjatë verës së kaluar nuk besoja se mund të ndodhnin aq shumë gjëra. I vetmi mendim ishte që të stërvitesha në maksimum, duke mësuar nga kampionët që kisha rrotull. Me kalimin e kohës vijova punën duke synuar që të vija në vështirësi trajnerin.
Si është atmosfera në skuadër me ndryshimet e reja?
Jemi një grup i mirë që po përgatitet në mënyrën më të mirë për nisjen e sezonit. Po punojmë shumë, teksa momentalisht duam të bëjmë më të mirën për këto sfida verore.
Cili është opinioni që keni krijuar për të ardhurit e rinj?
Të gjithë e njohim Reinën. Ai është një person fantastik edhe jashtë fushës. Edhe Haliloviçi po përshtatet shumë shpejt. Striniçin e presim dhe jam i bindur që do të ndihet mirë me shokët.
Po stërviteni në një stadium legjendar si "Rose Bowl" i Pasadenës, cilat janë ndjesitë?
Është tejet emocionuese të stërvitesh në një fushë, ku 24 vite më parë është luajtur një finale e Kampionatit Botëror(SHBA '94, Itali-Brazil).
Kënga e re e grupit "Nick is on fire" (Nik është zjarr), kushtuar Nikola Kaliniçit, vazhdon të jetë refren i këtij grumbullimi.
Ka disa ditë që e këndojmë. Nikola është një djalosh special, me të cilin i gjithë grupi ka raporte të shkëlqyera. Një këngë është minimumi për një mik të mirë.
Cilat janë objektivat tuaja për sezonin e ri?
Shpresoj vetëm që të jem sa
më i dobishëm për skuadrën duke shënuar gola. Llogaritë bëhen në fund, por sigurisht që synojmë të renditemi sa më mirë në kampionat, ndërkohë që të ecim sa më larg në Ligën e Europës dhe Kupën e Italisë.
Në fund, një koment për
miqësoret e kësaj faze përgatitore?
Janë të gjithë teste shumë tërheqëse kundër kundërshtarësh të një niveli të lartë. Duam të përgatitemi sa më mirë dhe të tilla ndeshje janë një motivim më shumë për të bërë sa më mirë në fushë.