Pinari: Viti i Partizanit, por duhen ndryshime
"Me 2- 3 goditje, ' demat' janë pretendentë kryesorë"
Partizani është për titull, Tirana duket e brishtë, Kukësi është kandidat kryesor për vendin e parë, ndërsa kampionati do të jetë shumë i fortë. Luan Pinari bën analizën e sezonit të ardhshëm, duke komentuar zhvillimet e merkatos te Partizani, Tirana dhe Kukësi. Ish-kapiteni i të kuqve, i...
Partizani është për titull, Tirana duket e brishtë, Kukësi është kandidat kryesor për vendin e parë, ndërsa kampionati do të jetë shumë i fortë. Luan Pinari bën analizën e sezonit të ardhshëm, duke komentuar zhvillimet e merkatos te Partizani, Tirana dhe Kukësi. Ish-kapiteni i të kuqve, i cili ka veshur edhe fanellën bardheblu dhe atë të Dinamos, tashmë në rolin e analistit sportiv, bën skanerin e skuadrave kryesore të kampionatit të ri. "Është momenti i duhur që Partizani të synojë titullin kampion, pasi nuk ka shumë diferenca mes ekipeve. I duhet një sulmues i mirë dhe 2-3 përforcime cilësore në mesfushë dhe mbrojtje", thotë ndër të tjera Pinari në intervistën e tij për gazetën "Panorama Sport".
Si e komentoni paraqitjen e Partizanit në Ligën e Europës, çfarë nuk shkoi me atë ekip?
Ato ishin ndeshje më shumë për të parë skuadrën se ku ka më shumë nevojë që të përforcohet për kampionatin. Nuk mund të japësh një gjykim shumë të qartë me këto dy takime. Megjithatë, Partizani u paraqit mirë në ato dy takime, por aq ishte forca e skuadrës në Europës. Mendoj se ka shumë vend që ekipi të përmirësohet për pjesëmarrjen në kampionatin e ardhshëm.
Çfarë i duhet Partizanit për sezonin e ri?
Në radhë të parë dhe më kryesorja, Partizanit i duhet një lojtar cilësor për sulmin që të japë garanci me golat e tij. Por, mendoj se të kuqve u duhen në të tria repartet nga një lojtar cilësor me mentalitet fituesi. Duhen futbollistë që të kenë cilësi, si në mbrojtje, në mesfushë dhe në sulm. I duhet medoemos nga një futbollist shumë cilësor për çdo repart.
Mendoni se Partizani është për titull sezonin e ardhshëm?
Nëse do të bëjë edhe 2-3 përforcime të mira siç thashë më lart, mendoj se do të jetë një ekip i denjë për të fituar titullin. Të gjitha skuadrat janë aty- aty dhe nuk kanë diferenca. Mendoj se ky është viti i duhur për Partizanin që të synojë të fitojë titullin kampion që i mungon prej shumë vitesh. Boshtin e futbollistëve e ka.
Si i gjykoni ndryshimet e shumta që bën, duke pasur
parasysh që e afroi sulmuesin Nikoliç dhe më pas e largoi. Ndikojnë negativisht në ekip?
Kjo është ajo që theksova edhe më lart. Nëse klubi do të afrojë futbollistë cilësorë me mentalitet fituesi në çdo repart, atëherë nuk do të ketë probleme të tilla me lëvizje të shumta dhe të shpeshta. Afrimet cilësore i bashkohen boshtit që ka dhe në këtë mënyrë krijohet një grup shumë konkurrues për sezonin e ri. Një ekip me të vërtet pretendent.
Tirana e rikthyer në Superiore
pas një viti mungesë ka nisur vrullshëm merkaton. Si e shihni këtë ekip?
Tirana ende më duket një ekip i brishtë. Po punojnë mirë për të ngritur një ekip të fortë, por do t'u duhet pak kohë futbollistëve që të ambientohen. Ai sezon larg Superiores i ka lënë disi mbrapa të tjerëve.
Cilat skuadra shihni si më favoritet për të fituar titullin në sezonin e ardhshëm?
Ekipin kryesor pretendent për titull është Kukësi. Ndoshta, është ekipi që ka
diçka më shumë se të tjerët dhe ka qenë i konsoliduar. Mendoj se Skënderbeu dhe Flamurtari janë ekipet për t'u parë.
Si e parashikoni kampionatin e ardhshëm?
Mendoj se do të jetë një kampionat me rivalitet të fortë. Janë 5-6 ekipe që synojnë titullin dhe janë në një nivel thuajse të njëjtë. Do të jetë shumë herë më i fortë në krahasim me sezonin e kaluar. Skuadrat nuk kanë shumë diferenca mes tyre dhe kjo do ta bëjë garën të ashpër mes pretendentëve për titull.