Tërhiqet Sinani: Vllazni, nuk jam gati për drejtor
Gardiani 36-vjeçar heq dorë nga futbolli i luajtur: Jam gati për të ndihmuar brezat e rinj
36-vjeçari Mikel Spaho do të ketë detyrën e trajnerit të portierëve te skuadra e Lushnjës për sezonin e ri në Kategorinë e Parë. Pas një karriere të gjatë te Lushnja dhe dy sezoneve te Flamurtari, Spaho ka dorëzuar dorezat për të bërë trajnerin e lojtarëve midis tri shtyllave. "Patjetër, që jam i emocionuar që do të jem trajneri i portierëve të Lushnjës. Të punosh trajner në një klub tradicional dhe me emër në futbollin tonë është kënaqësi. Pothuajse të gjithë karrierën time e kam përqendruar tek Lushnja. 16 vjet portier te kjo skuadër. Do të vë në punë të gjithë eksperiencën time prej 18 vjetësh në portë. Jam i bindur se do të na shkojë mbarë", është shprehur trajneri i portierëve, Mikel Spaho. Tre portierë do të ketë Lushnja për sezonin e ri, 29-vjeçarin Ibrahim Bejte që pritet të mbajë peshën kryesore këtë sezon të ri, si dhe të rinjtë Arjol Kaloshi dhe Dorjan Elezi.
Miqësorja - Lushnjarët do të luajnë miqësoren e dytë në kuadrin e përgatitjeve për sezonin e ri. Sot, pasdite, verdhejeshilët janë të ftuar në Kavajë, për të luajtur një miqësore me Besën. Kjo është miqësorja e dytë për skuadrën e drejtuar nga Ilir Gjyla. Verdhejeshilët kanë luajtur vetëm një miqësore deri më tani, kur të enjten e kaluar humbën 2-4, në Fier, ndaj Apolonisë. Te Lushnja stërviten aktualisht 21 futbollistë, ndërsa kanë marrë "OK"-in vetëm 12 prej tyre. Bashkë me verdhejeshilët stërviten edhe mesfushorët Armando Mezini dhe Xhuljan Ikonomi. Të dy mesfushorët kanë luajtur më parë me skuadrën verdhejeshile. Por, për t'u rikthyer në stadiumin "Roza Haxhiu", atyre u duhet të shkëputen nga klubi i Shkumbinit, pasi janë nën kontratë deri në janarin e vitit të ardhshëm. Duke qenë se Shkumbini ra në Kategorinë e Dytë, të dy futbollistët shpresojnë të rikthehen te Lushnja, ku stërviten. Alban Alushi