Vllaznia, tkurren për trajnerin e ri
Lici: Përzgjedhja e trajnerit, e kondicionuar nga paga
Dje është pritur që të bëhet edhe përzgjedhja e drejtorit sportiv dhe trajnerit të ri të Vllaznisë, por një gjë e tillë nuk ka ndodhur. Nga sa mësohet, drejtuesit e klubit, dhe më konkretisht administratori Suad Lici dhe bordi, kanë vendosur që pasi të kishin mbërritur të gjitha ofertat, t'u bënin me dije kandidatëve për drejtor sportiv dhe atyre për trajner edhe shumën që do t'u afronin si pagë mujore. Nisur nga kjo ofertë që u bën klubi, atëherë kandidatët e interesuar do të sillnin pranë klubit përmes e- maileve edhe përgjigjet e tyre. Pas kësaj procedure, drejtuesit do të shqyrtonin edhe alternativën më të mirë për trajner e po ashtu edhe për drejtor sportiv. Vetë administratori Lici e ka pranuar se Vllaznia do të jetë e kondicionuar për të përzgjedhur trajnerin edhe nga niveli i pagës, i cili do të jetë disa herë më i ulët në krahasim me rrogën që ka marrë trajneri dhe stafi i tij një sezon më parë. Pritet një ulje drastike e pagesës për trajnerin e ardhshëm. Kjo nga ana e vet do të bëjë të mundur që të ketë edhe
tërheqje të trajnerëve që kanë aplikuar pranë klubit. Siç dihet, trajneri i fundit i Vllaznisë, Ernest Gjoka, ka marrë 5 milionë e 250 mijë lekë të vjetër rrogë në muaj. E ndërsa shuma që do të përfitojë trajneri i ri do të jetë disa herë më e ulët.
DEKLARATA - "Përzgjedhja e trajnerit do të jetë e kondicionuar nga niveli i pagës. Rroga do të jetë disa herë më e ulët nga ato që kanë përfituar trajnerët një sezon më parë. Kjo mund të na bëjë që të vlerësojmë atë që do të pranojë edhe ofertën tonë. Por, ajo që është pozitive është se gjithçka do të jetë e hapur dhe të gjithë do të jenë të barabartë. Për më tepër nuk do të ketë një përzgjedhje personale nga ana ime apo e çdokujt tjetër. Gjithçka do të jetë e ndërmarrë në mënyrë të përbashkët dhe
me një konsensus të plotë. Shpresojmë që do të bëjmë përzgjedhjen e duhur për të mirën e Vllaznisë dhe të asaj që të gjithë po kërkojmë. Deri të hënën gjithçka do të jetë gati dhe ne do të nisim nga puna", ka deklaruar administratori Suad Lici.