Cungu: Po përgatitemi edhe për penallti, presioni mbi rivalin

90 minuta në Baku do të duken shumë të gjata për Kukësin, por mund të rezultojnë edhe historike. Sepse të besuarit e Armando Cungut kanë shpresa dhe shanse reale për të bërë mrekullinë dhe për t'u rikthyer me një kualifikim në raundin e ardhshëm të Ligës së Kampionëve. Dhe trajneri i skuadrës verilindore e pranon që do t'i luajnë shanset, sado të vogla që janë. Rezultati 00 në sfidën e parë i jep avantazh Kukësit sepse nuk ka pësuar gol në shtëpi, por Karabaku i Agollit është një ekip shumë i fortë. Në një prononcim për "SuperSport", Cungu thotë se skuadra duhet të tregojë karakter. Besimi - "Për aq kohë sa rezultati është 0-0, kjo të jep shpresë për kualifikimin. Një gol të jep shumë shpresë, por brenda një 90 minutëshi mund të ndodhin shumë situata loje. E rëndësishme është që ekipi të luajë me dëshirën dhe karakterin e ndeshjes së parë. Pavarësisht se kundërshtari kuotohej dukshëm si favorit, asgjë nuk mund të na ndalë të zbresim në fushë dhe ta provojmë. Në ndeshjen e parë ekipi luajti mjaft mirë. Tani, pse jo mos ta provojmë edhe atje dhe të luajmë për kualifikim".

Vlerat e Kukësit- "Kukësi nuk ia dha mundësinë Karabakut të bënte shumë gjëra. Rivalët janë i njëjti ekip që vjet luajtën në Champions, duke barazuar dy herë me Atletikon e Madridit, ndërsa me Romën barazuan një herë dhe humbën në ndeshjen tjetër 2-1. U duhet dhënë më tepër vlerë lojtarëve të Kukësit, që nuk i dhanë mundësi këtij kundërshtari për të na goditur".

Me këmbë në tokë- "Vetë rezultati të jep mundësinë dhe na kërkon të jemi të kujdesshëm, si bëmë në Valeta, por edhe në Shkodër. Duhet të jemi shumë të thjeshtë në lojë dhe është e rëndësishme të kemi shpinën të nxehtë për të mos u goditur. Do të kërkojmë të kemi pak më tepër mundësi, të mos kemi elektrizimin si në ndeshjen e Shkodrës, ku shfaqëm nervozizëm në finalizimin e aksioneve".

Rexhinaldo- "Ardhja e Rexhinaldos është një vlerë më tepër dhe një ndihmë më tepër për Kukësin, në Europë dhe në kampionat. Këto ditë do të shohim nëse do të jetë i aftë të përballojë ndeshjen. Në ndeshjen në Azerbajxhan do të jetë pjesë e grupit dhe sado pak kontributi i tij mund të jetë i vlefshëm në minuta të caktuara. Përgjithësisht, lojtarët janë në gjendje të mirë. Mund të kemi ndonjë problem viroze, por së bashku me stafin mjekësor po punojmë që të gjithë të jenë prezentë, sepse nevojitet kontributi i të gjithëve".

Penalltitë- "Patjetër që po përgatitemi dhe t'i provojmë edhe të shkojmë te penalltitë, është mëse normale pas rezultatit të parë. Nisemi të barabartë dhe jemi gati për çdo gjë".

Presioni- "Nuk duhet të kemi presionin e ndeshjes me Valetën, ku patëm ngërç psikologjik sepse cilësoheshim favoritë. Është shumë e rëndësishme të jemi të qetë, presioni është te kundërshtarët sepse ata cilësohen favoritë dhe duhet të dimë ta shfrytëzojmë këtë presion psikologjik të Karabakut dhe ta kthejmë në favorin tonë".