Notat, Hamilton i pagabueshëm, Fetel me ulje-ngritje
Britaniku i Mercedes konfirmohet si lider
Të dielën, me Çmimin e Madh të Hungarisë, përfundoi gjysma e sezonit në "Formula 1", ku Ljuis Hamilton arriti ta thellojë akoma më shumë diferencën e pikëve me rivalin e tij Sebastian Fetel. Britaniku mori një tjetër sukses dhe tashmë është i shkëputur me 24 pikë nga gjermani i Ferrarit, duke bërë që t'i afrohet më tepër fitores finale në "Formula 1", edhe pse mbeten shumë gara për t'u zhvilluar. Por le t'i gjykojmë një e nga një paraqitjet e protagonistëve kryesorë në cirkuitin e Budapestit.
LJUIS HAMILTON, NOTA 10 - Në provat kualifikuese bëri diferencën në shi, ndërkohë që në garën e së dielës, edhe pse kushtet klimaterike nuk ishin favorizuese për Mercedesin, e tregon veten në një formë të shkëlqyer duke mos gabuar asgjë në pistën e Budapestit. Tashmë duket sa ka nisur shkëputjen në renditjen e përgjithshme botërore.
SEBASTIAN FETEL, NOTA 7 - Penalizohet nga strategjia e skuadrës në gjysmën e parë të garës, por pas futjes në "box" rikthehet mirë në pistë ku arrin të marrë vendin e dytë. Megjithatë, gjermani i Ferrarit zhgënjeu në provat kualifikuese duke ia komplikuar shumë punën vetes në ditën e garës. Vitin e kaluar, pas Çmimit të Madh të Hungarisë, Fetel kishte 14 pikë avantazh ndaj Hamiltonit, ndërkohë që tani e shikon veten 24 pikë pas tij dhe kjo situatë është shumë shqetësuese për pilotin gjerman. KIMI RAIKONEN, NOTA 7.5 - Ishte më mirë se kolegu i skuadrës në provat kualifikuese dhe mund bënte këtë gjë edhe në garë, pavarësisht faktit që kreu dy ndalesa. Kimi ka 30 pikë më tepër nga sezoni i kaluar, ndërkohë që kolegu i skuadrës Fetel regjistron 13 pikë më pak se në sezonin e kaluar. Pra, drejtuesit e Ferrarit duhet të mendohen mirë para se ta zëvendësojnë finlandezin me pilotin Çarls Lëklerk.
DANIEL RIÇARDO, NOTA 8 - Niset nga radhët e fundit dhe falë aftësive që zotëron ngjitet deri në vendin e katërt, duke kryer xhiro shumë të shpejta. Një përmbysje e jashtëzakonshme, por që në fund të garës u vu në rrezik nga manovra e jashtëligjshme që kreu Botas.
VALTERI BOTAS, NOTA 7 - Për punën e madhe që po kryen ndoshta meriton një notë më të lartë, por gabimi që kreu gjatë xhirove të fundit ku goditi fillimisht Fetelin e më pas Riçardon e penalizon. Fillimisht mundëson shkëputjen e Hamiltonit, duke u bërë një pengesë e madhe për makinat Ferrari. Është piloti ideal që të gjithë numrat 1 kërkojnë të kenë në skuadër, edhe pse Botas nuk është shumë i kënaqur me rolin sekondar që ka në ekip. RED BULL, NOTA 3 - Motori i kësaj skuderie nuk është aspak rezistent dhe kjo u vërtetua edhe në garën e Hungarisë, ku e la në rrugë shumë shpejt Vershtapenin. Edhe Riçardo është penalizuar në garat e kaluara nga motori i brishtë i Red Bull.
UILLIAMS, NOTA 4 - Mungesa e investimeve sjell rrjedhimisht rezultate të dobëta, kështu një nga emrat më të mëdhenj në historinë e "Formula 1", tashmë e shikon veten në fundin e klasifikimit për skuderitë.