Maldini tradhton: Interi, më i fortë se Milani
Ish-kapiteni bën opinionistin: Me CR7 fiton e gjithë Seria A
Përflitet për një rik thim te Milani në rolin e drejtuesit, por Paolo Maldini ka zgjedhur të jetë pjesë e një realiteti tjetër, që gjithsesi ka lidhje me futbollin. Ish- kapiteni kuqezi është zgjedhur së bashku me Luis Figon dhe Andrij Shevçenkon si imazh dhe opinionist i një platforme dixhitale që do të transmetojë ndeshjet e Serisë A. Fillimisht Leonardo, e më pas edhe Gatuzo, të gjithë mezi e presin të rikthehet te Milani, por legjenda duket se ende nuk ka marrë ofertën e shumëpritur. "Kam pasur kontakte në të kaluarën dhe nuk e mohoj dëshirën time për të qenë pjesë e bordit drejtues të Milanit. Në të kaluarën më janë ofruar role që nuk përqaseshin me idetë e mia dhe nuk kam pranuar, por së ardhmes nuk i dihet kurrë, ndaj nuk e përjashtoj që një ditë të rikthehem në klubin e zemrës".
Italia futbollistike ndërkohë po bën hapa para. Kampionët kanë nisur ta preferojnë përsëri, teksa shembulli më i mirë është Kristiano Ronaldo. Portugezi, pas tri vitesh si kampion Europe, përzgjodhi Juventusin si etapë të re të karrierës së tij, megjithëse në Madrid kishte gjithçka që ëndërronte. Një kampion si Maldini e kupton fare mirë etjen e luzitanit 32-vjeçar, teksa për transferimin e tij në Serinë A tha: "Ardhja e Ronaldos ka entuziazmuar këdo që ndjek Serinë A dhe jo vetëm tifozët e Juventusit. Bardhezinjtë kanë përvetësuar një armë që mund t'i ndihmojë maksimalisht për të arritur objektivin e tyre madhor që është Liga e Kampioneve. Ky operacion nuk sjell benefite vetëm për skuadrën e Alegrit, por për të gjithë klubet e tjera të Serisë A dhe për futbollin italian në tërësi".
Seria A- Kampionat italian premton më shumë spektakël, me Interin, Romën dhe të tjerat që i janë përgjigjur më së miri "Zonjës së Vjetër" me investime të bujshme në merkato. "Në zonat e larta të renditjes, në sezonin e ri do të ketë shumë konkurrencë. Ekipet janë përforcuar shumë dhe do të mbizotërojë ekuilibri. Tifozët do të
shijojnë një kompeticion emocionues, fati i të cilit mendoj se do të zgjidhet vetëm në javët e fundit".
Milanezet- Te Milani luajti gjatë gjithë karrierës duke fituar trofe e duke thyer rekorde. Në lidhje me merkaton kuqezi, Maldini ruan qetësinë, duke shpjeguar: "Të mos harrojmë se Milani sapo ka nisur një cikël tjetër pas atij kinez. Do të duhet pak kohë, por afrimet e para më duken të goditura, sidomos Higuain. Ai është një sulmues i kompletuar dhe me përvojë, ndaj mendoj se do t'i japë një ndihmesë të madhe Gatuzos dhe skuadrës me golat dhe karakterin e tij". Teksa elozhet më të mëdha ia rezervoi Interit, ekip për të cilin tha: "Me mënyrën sesi kanë vepruar në merkato, mendoj se Interi ka një skuadër të jashtëzakonshme".