Gjici s'fal më, zbulohet mbledhja në... Azerbajxhan
Presidenti, "urdhër" për kualifikim me gjeorgjianët
Kukësi u kthye në Shqipëri vetëm dje, duke lënë pas një udhëtim rraskapitës. Trajneri Armando Cungu la pushim ekipin, pasi e gjithë nata duke u gdhirë e premte u kalua në aeroportin e Stambollit, për të mbërritur në orën 08:00 në aeroportin "Nënë Tereza". Këtë herë klubi nuk zgjodhi të merrte një avion çarter, por u detyrua të udhëtonte me linjën tranzitore me itinerar Tiranë-Stamboll-Baku. Mirëpo, ajo që ka ndodhur gjatë udhëtimit është mjaft e veçantë. Ka të bëjë me presidentin Safet Gjici, i cili njihet si një person me shumë ego dhe që kurrë nuk e pranon humbjen. Pas përfundimit të takimit, gazeta mëson se presidenti Gjici thirri në një mbledhje urgjente drejtorin Nderim Nexhipi, trajnerin Cungu, si dhe pjesëtarët e tjerë të stafit, Jonuz e Rrahman Hallaçi Natyrshëm u kërkoi llogari pse ndodhi kjo humbje në këtë mënyrë. Zyrtarët i dhanë shpjegimet përkatëse presidentit në lidhje me performancën
e ekipit, e më pas ky i fundit u zbut. Gjici i kërkoi Cungut dhe Nexhipit, që të bëjnë relacion për çdo lojtar, si dhe të marrin masa për atë që nuk kanë rendimentin e duhur. Në vazhdën e kritikave të tij ishte dhe trajneri i portierëve, Ermal Nexhipi, të cilit i kërkoi llogari për momentet
"jo" të Frashërit gjatë ndeshjes. Në fund u dha ultimatum drejtuesve që nëse Kukësi nuk kalon Torpedon, të gjitha do ta kenë pisk. Ndërsa sa u përket lojtarëve, mësohet se presidenti nuk ka pasur asnjë kontakt gjatë kthimit. As në hotel dhe as në avion, Gjici nuk ka dashur
të komunikojë me asnjë futbollist, qoftë edhe me "senatorët". Ai ka shprehur ndjeshëm zhgënjimin e tij për humbjen dhe lojën e zhvilluar, por te "dera" është ndeshja e turit të tretë të Ligës së Europës ndaj Torpedos dhe Gjici pret kualifikimin në "play-off". S.Sulozeqi