Nako: Basti me veten, pse u riktheva tek Apolonia
“Klubi ka një strategji afatgjatë, ngjitemi në Superiore”
udin Nako vlerëso het pa hezitim si një ndër prurjet më cilësore të Apolonisë gjatë këtij sezoni. Është futbollisti që ka mbi shpinë më shumë përvojë se kushdo tjetër te bardhejeshilët, çka di ta vërë mirë në shfrytëzim në dobi të skuadrës. Është ndër të parët që u rikthye për të ndërtuar një Apoloni pretendente dhe tani bën një analizë mbi gjendjen aktuale të skuadrës fierake.
NAKO - "Skuadra ka progres dhe treguesit janë pozitivë, - thotë qendërmbrojtësi fierak. - Po ecet në rrugën e mbarë dhe të gjithë lojtarët janë të motivuar në maksimum për të arritur formën e tyre optimale e për të dhënë më të mirën, duke u vënë në shërbim të objektivave që ne duam të arrijmë gjatë këtij sezoni". Së bashku me futbollistin tjetër të përvojës, Andi Priftin, 31-vjeçari Nako krijon dyshen e qendrës në mbrojtjen e Apolonisë, të paktën kjo ka qenë zgjedhja e trajnerit Miho në 5 ndeshjet miqësore që janë zhvilluar deri tani gjatë këtyre përgatitoreve. Janë plot 7 gola të pësuar në 5 ndeshje dhe Nako e ka një opinion edhe për këtë fakt. "Nuk duhet parë si diçka alarmante, pasi janë vetëm ndeshje përgatitore dhe jemi në kohë për t'u përmirësuar. Sigurisht që duhet të përmirësohemi dhe ende nuk jemi në formën më të mirë, por po punojmë fort në këtë drejtim. Ne funksionojmë në grup dhe nuk shihen faji si individual, por si repart, ndaj them që edhe ne të difensivës duhet të rrisim nivelin e përgatitjes dhe kujdesin në lojë, në mënyrë që të evitojmë gabimet e të minimizojmë hapësirat për pësimin e golave", thotë qendërmbrojtësi Nako. Veç të tjerash, futbollisti fierak e sheh si mjaft të spikatur alternimin e brezave të lojtarëve dhe e evidenton si një nga pikat kyçe të punës së stafit teknik. "Po bëhet një punë e kujdesshme në këtë drejtim, në evidentimin e të rinjve të talentuar, por edhe në përshtatjen e tyre brenda grupit dhe edukimit të tyre me mentalitetin e duhur dhe përgjegjësinë që duhet të ndiejnë si futbollistë të Apolonisë. Janë vërtet lojtarë që të impresionojnë dhe me të ardhme të garantuar", thotë mes të tjerash për "Panorama Sport" mbrojtësi i Apolonisë, Rudin Nako. Ndërkaq, skuadra fierake do të luajë sot miqësoren e radhës, në orën 17:30, ku do të presë në stadiumin "Loni Papuçiu" skuadrën e Luftëtarit. Një sfidë që pritet me shumë interes nga të dyja ekipet.