Taullau nënshkruan për Lushnjën

Lushnjarët vijojnë të përgatiten në kushtet e shtëpisë, ndërsa të hënën e 13 gushtit skuadra do të zhvendoset në Pogradec, ku do të përgatitet në kushte grumbullimi. Një nga "veteranët" e verdhejeshilëve, mbrojtësi 32- vjeçar Erion Xhafa, në një prononcim për gazetën "Panorama Sport" shprehet se ekipi është i mobilizuar, teksa synimet mbeten të larta. Ndërkaq, në seancën e djeshme stërvitore lushnjarëve iu është bashkuar mesfushori 32vjeçar Ledjan Taullau. Mesfushori lushnjar ka firmosur edhe kontratën duke u bërë lojtari i 19-të që nënshkruan kontratë me Lushnjën për edicionin e ri. Klubi lushnjar vijon të jetë në kontakte për të afruar edhe 2-3 lojtarë të tjerë. DEKLARATA

"Ekipi ka pësuar shumë ndryshime nga viti i kaluar. Jemi duke punuar për Lushnjën e edicionit të ri. Në ekip ka lojtarë të eksperiencës si kapiteni Sefa, portieri Bejte, Bufasi, Alushi, Allkanjari. Bashkë me ne janë rikthyer te Lushnja edhe lojtarë që më parë kanë luajtur me ne. Jemi duke u përgatitur që fillimi i shtatorit të na gjejë midis pretendentëve. Lushnjën e quajnë pretendente dhe besoj se kështu do të jemi. Kemi nevojë për disa përforcime me lojtarë cilësorë dhe besoj se klubi do t'i realizojë ato. Patjetër që problemi i fushës është real dhe prezent te Lushnja. Një ekip që ka pësuar ndryshime e ka më se të domosdoshme fushën. Unë luajta në miqësoret, por isha shkëputur që nga tetori i vitit të kaluar për arsye dëmtimi. Mendoj se Pogradeci do të jetë pjesa më e rëndësishme e përgatitjeve tona", u shpreh mbrojtësi Xhafa. Alban Alushi