Bylisi merr tre mbrojtës në provë
Ballshiotët po rrisin dozat e ngarkesave në stërvitje. Kanë kaluar tri ditë dhe Bylisi po stërvitet me dy seanca stërvitore, ndërsa skuadra mallakastriote ka shtuar radhët edhe me tre futbollistë të rinj. Nga sa bëhet e ditur, janë lojtarë të kombëtareve të moshave, madje bëhet fjalë për një mbrojtës qendre që vjen nga radhët e Partizanit, një mbrojtës nga Dinamo, si dhe një mbrojtës i linjës së majtë që vjen nga Akademia e PAOK në Greqi. Të tre lojtarët do të testohen dhe më pas do të jetë stafi që do të thotë fjalën e fundit për ta, nëse vlejnë ose jo për objektivat që ka Bylisi. Por, nga të dhënat paraprake, bëhet fjalë për tre futbollistë me perspektivë, që më shumë gjasa mund të firmosin në Ballsh. Me këta të tre reparti i mbrojtjes kompletohet, duke pasur parasysh largimet në difensivë. Për ballshiotët kjo javë do të jetë si periudhë rehabilitimi, ndërsa seancat do të vijojnë edhe sot dy herë në ditë. Ndërkohë, nga sa bëhet e ditur, javën që vjen klubi do të mundësojë edhe zhvillimin e miqësoreve me skuadra të Kategorisë së Dytë apo dhe të Parë.
TË HUAJT
Bylisi ka pasur në strategjinë e vet merkaton me lojtarë të huaj dhe kryesisht talente nga Afrika. Krahas Ntepes, Çukukës apo Samndëa, që nuk janë më shumë së 2223 vjeçarë, në Ballsh priten edhe 2-3 futbollistë nga Nigeria mjaft të talentuar. Klubit i janë servirur si talente dhe që kanë luajtur në Akademitë e Lagosit. Synimi i skuadrës ballshiote në kampionatin e ardhshëm do të jetë ngjitja në Superiore. Erjon Saliu