Ish-lojtari i Sopotit, këngëtar rroku në Brazil
“Nuk ia vlente të luaja më, tani po bëhem i famshëm”
istoritë e futbollistëve të huaj që vijnë luajnë në Shqipëri janë nga më të ndryshmet. Disa e përdorin si trampolinë kampionatin tonë për të kaluar më pas në ekipe më me emër në Europë. Disa të tjerë vijnë me këtë ëndërr, por përfundojnë rrugëve të Shqipërisë duke bërë më pas gjithfarë punë për të mbijetuar, ndërsa ka dhe të tjerë që vijnë si futbollistë dhe kur kthehen bëhen këngëtarë të një grupi rroku. HISTORIA E RRALLË
Kjo i ka ndodhur ishmbrojtësit të Sopotit, brazilianit Pedro Mendes Mistieri, i cili pas një eksperience të pasuksesshme në kampionatin shqiptar, u kthye menjëherë në vendlindje duke u munduar të bëjë një punë tjetër, pasi me futbollin nuk po ia arrinte. Dhe papritur zbuloi se ishte një këngëtar i zoti. Vetëm 21 vjeç, futbollisti vendosi të lërë futbollin për të ndjekur një tjetër ëndërr që po i rezulton më e suksesshme. RRËFIMI
"Futbolli ka qenë ëndrra ime, ashtu si e shumë djemve të tjerë të rinj që sportin e futbollit e shohin si ëndrrën e vetme për t'u ndjekur, pasi aty i ke të gjithë të mirat. Në moshën 20-vjeçare u transferova në Shqipëri me Sopotin, por gjërat nuk po shkonin si duhet. Stërvitesha me pasion, por në fushë nuk përshtatesha si duhet dhe më shume rrija në stol. Mërzitesha shpesh dhe shumë mendime më vinin ndërmend. Mendoja ta lija sportin, por çfarë të bëja më pas nuk e dija. U ktheva në Brazil dhe vetëm mendoja se çfarë të bëja me jetën time. Dhe ashtu rastësisht më lindi ideja t'u bashkohesha disa të afërmve të mi që kanë krijuar një grup rroku dhe bëjnë muzikë. Më pëlqeu ideja, por kur testova edhe zërin më pëlqeu edhe më shumë e gjitha kjo. Iu bashkova grupit me kohë të plotë dhe dhashë gjithçka aty për rreth 1 vit. Idetë nuk ndaleshin dhe, veç muzikës, mendova të hap edhe një linjë veshjesh me logon e grupit tonë muzikor dhe çdo gjë ka ecur më së miri. As vetë nuk e mendoja se do kaloja nga futbolli diku tjetër dhe do kisha këtë sukses. E falënderoj zotin për këtë", përfundoi prononcimin e tij për gazetën ish- lojtari brazilian i Sopotit. Një histori e rrallë se si një lojtar që dështon në fushë, mund të gjejë alternativa të tjera për të mbijetuar. Një nga ato ngjarje të veçanta që të habisin kur i dëgjon.