Rumenige refuzon Marsial, Junajtid do Boateng
Drejtuesi i Bajernit nuk e dëshiron francezin e Mançesterit, për arsye mbipopullimi të mesfushës
Antoni Marsial është emri më i përfolur në merkaton bavareze në këto javë të fundit. Në fillim, Bajerni ka kërkuar lojtarin, duke ofruar 50 milionë euro, shumë kjo që ka qenë e pamjaftueshme për klubin anglez që ka kërkuar 70 milionë. Më pas, Junajtid ka sugjeruar që skuadrat të kryejnë një shkëmbim kokë më kokë midis francezit dhe sulmuesit polak, Robert Levandovskit. Por, kjo është kundërshtuar nga klubi gjerman që nuk kërkon të largojë bomberin nga skuadra. Numri dy i klubit bavarez, Karl Hainc Rumenige, ka deklaruar se klubi nuk është më i interesuar për Marsial, pasi në skuadër ndodhen shumë lojtarë në pozicionin e tij. "Kam lexuar në media që kemi interes për Marsial, nuk është e vërtetë. Këtu ka shumë lojtarë në pozicionin e tij. Ju kujtoj që para një javë nënshkruam një kontratë me një lojtar të talentuar kanadez që po bën shumë mirë në 'MLS', Dejvis", u shpreh Rumenige. E vërteta qëndron te fakti se Bajerni realisht ka një skuadër të kompletuar në repartin e sulmit dhe të mesfushës. Kujtojmë që në përfundim të sezonit të fundit, Arjen Roben dhe Frank Riberi rinovuan edhe për një sezon tjetër në Mynih. Ndërkohë për sa u përket largimeve, Boateng duket se ka bërë gati valixhet, së bashku me Vidal. Mbrojtësi gjerman u duk shumë pranë kalimit në Paris. Por, dje skuadra e Junajtid ka shfaqur interes për të. Murinjo kërkon të krijojë një mbrojtje me lojtarë me eksperiencë dhe Zherom është një ish-kampion bote me Gjermaninë në 2014. Trajneri portugez u ka bërë të ditur drejtuesve të klubit anglez për ta transferuar Boateng sa më shpejt të jetë e mundshme, pasi nuk kërkon të humbasë kohë.