Formacioni, ja kush rrezikon stolin te Tirana

Tirana, Ze Maria ka dilema nga mbrojtja në sulm

Tirana është gati për rikthimin në Superiore! Të dielën ajo do të tregojë forcën e saj në miqësoren e luksit me Prishtinën. Dhe pikërisht në këtë miqësore do të shihet se cila do të jetë skuadra për sezonin e ri, ndonëse dilemat për ata që do të luajnë titullarë janë të mëdha. Me llogaritjet e bëra, del që shumë nga titullarët e sezonit të shkuar apo djemtë që ngjitën skuadrën në Superiore, do të mbeten jashtë 11-shes.

PORTA - Për sa i përket formacionit, Ze Maria ka dyshime pothuajse në çdo repart, me përjashtim të portës. Në katërkëndorin bardheblu, Ilion Lika është i konfirmuar si titullar i padiskutueshëm. Aktualisht, Alesio Abibi nuk e rrezikon Likën, i cili me eksperiencën dhe garancinë që jep, mbetet i palëvizshëm nga porta. Forma e tij sportive, paçka moshës është ajo e një djaloshi në shpërthim dhe garanci për Tiranën.

MBROJTJA - Situata në këtë repart është shumë e komplikuar, pasi mbetet "zona" më e luftuar e ekipit. Të gjitha pozicionet janë të dubluara. Teorikisht, në qendër të mbrojtjes,

Marvin Turtulli dhe Sedat Berisha do të jenë titullarët në kampionat. Gjithsesi, Klisman Cake e Vinsent Atinga do ta luajnë deri në fund për një vend në 11-she. Në miqësoren me Prishtinën, në qendër të mbrojtjes do të luajnë Atinga e Berisha, por me të gjitha

mundësitë, kjo dyshe nuk do të luajë në Superiore. Problemi mbetet nga krahët e mbrojtjes. Djathtas Dorian Kërçiku e Albi Doka luajnë për një vend. E njëjta situatë majtas, me Erjon Hoxhallarin që niset si titullar, por me Eni Imamin, gati për të luajtur. Në fakt, në stërvitjen e fundit

me formacion të projektuar për miqësoren me Prishtinën, Kërçiku dhe Imami kanë luajtur titullarë, ndonëse Hoxhallari nuk ishte në ekip, i huazuar te Laçi. Të shohim deri në fund se si do të shkojë situata, por të gjithë lojtarët e mësipërm fare mirë mund të luajnë titullarë,

edhe pse shumë do të vendosë miqësorja me Prishtinën dhe çfarë vetë djemtë do të japin në fushën e lojës.

MESFUSHA - Ardhjet e Edon Hasanit, Uinful Kobinës dhe Dejan Blazhevskit kanë ngatërruar shumë situatën. Jashtë nga formacioni, rrezikon të mbesin Bedri Greca dhe Asion Daja. Në ndeshjen e nesërme, në mesfushë pritet të luajnë Karabeci, Maveje dhe Hasani në qendër, ndërsa në krahë Kobina, djathtas e Blazhevski majtas. Në stol për momentin Daja, Greca, por edhe Grent Halili, i cili sezonin e shkuar ka luajtur

majtas dhe djathtas, sipas dëshirave të Ze Marias.

SULMI - Është reparti që ka tre lojtarë, Junus Sentamun, Majkëll Ngonë dhe Ernest Muçin. Ngoja është jashtë skuadre, i dëmtuar dhe Sentamu do të luajë titullar. Në situatë normale, njëri prej dy të huajve do të mbetej jashtë formacionit. Përfundimisht, në këtë moment që flasim janë shumë lojtarë të mirë, të cilët rrezikojnë një vend titullari te Tirana. Situatën e ka në dorë Ze Maria, i cili do të vendosë, se me kë 11-she do të luajë sezonin e ri në Superiore. Gjithçka mbetet për t'u zbuluar...