Kukësi pret një mesfushor në pronësi të Juventusit
Nga kapiteni Shameti te Musolli, pezull rinovimi i kontratave
Nga Liga e Europës në merkato. Te Kukësi po i paraprijnë gjithçkaje, pasi kampionati është afër dhe synimi kryesor do të jetë shpallja kampion në sezonin 2018-2019. "Panorama Sport" zbulon ekskluzivisht se klubi ka arritur në parim marrëveshjen me një mesfushor nga Guinea, i cili është në pronësi të gjigantëve të Juventusit. Edhe pse nuk ka luajtur kurrë me skuadrën bardhezi, italianët e kanë huazuar në sezonin e fundit në Austri. Bëhet fjalë për 19vjeçarin Omar Ture, i cili është një mesfushor shkatërrues tipik dhe pasi hodhi hapat e parë të karrierës me Inter U-17, më pas kaloi te Juventus, duke luajtur me skuadrën U-19 dhe Juventus B, që këtë sezon militon në Serinë C. Drejtuesit e Kukësit kanë biseduar me agjentin e lojtarit dhe tashmë presin vetëm zyrtarizimin e marrëveshjes, pasi të marrin edhe lejen e klubit bardhezi. Ture është nën kontratë me Juven deri në verën e vitit të kaluar dhe te Kukësi do të vijë në formë huazimi. KONTRATAT
Janë disa lojtarë të rëndësishëm te Kukësi që u përfundojnë kontratat dhe në kulmin e angazhimit në Europë, ky është një ngërç që duhet zgjidhur sa më parë nga klubi. Kapiteni Ylli Shameti, mbrojtësit Simon Rrumbullaku, Rustem Hoxha dhe Albi
Alla, si dhe mesfushorët Donjet Shkodra, Irakli Dzaria e Besar Musolli, dalin lojtarë të lirë menjëherë sapo Kukësi të eliminohet nga Europa. "Panorama Sport" mëson se klubi synon të rinovojë me shtyllat e ekipit, Shameti e Musolli, por gjithashtu edhe me Rrumbullakun. Nga ana tjetër, pritet që të propozojë ulje page për Allën,
por nuk dihet nëse ky i fundit do ta pranojë. Të larguar mund të konsiderohen Plaku dhe Shkodra, ndërsa ka dilema për Dzarian. Gjithashtu braziliani Roxher Xhunior Rodriges, që nuk u pa asnjëherë në fushë, do t'i thotë lamtumirë Kukësit, pasi nuk e ka bindur stafin teknik, edhe pse erdhi me bujë te Kukësi.