Bajerni fut në krizë Junajtid, Mou: Dështakë!
Vendos një gol i Martinez. Mou prek fundin: Po nuk investuam, do dështojmë
Premierë e suksesshme e Bajernit në "Allianz Arena" pas transformimit të stadiumit. Bavarezët mposhtin 1-0 Junajtid në trofeun e "Telekom Sport". Edhe pse një miqësore, kjo nuk i pengoi tifozët e rekordmenëve gjermanë që të mbushnin edhe një herë stadiumin në kapacitetin e tij të plotë (75 mijë spektatorë). Vendos një gol i Martinezit në pjesën e dytë. Skuadra e Kovaçit dominoi ndaj asaj të Murinjos një javë përpara se të përgatisë trofeun e parë të sezonit, Superkupën e Gjermanisë kundër Frankfurtit (ish-skuadrës së tij) më 12 gusht. Shenjat e ngarkesës nga kampi stërvitor në "Tegernsee" u vunë re, por formacioni titullar i trajnerit kroat pati shanset më të mira në pjesën e parë (Si Tiago (7') ashtu edhe Gnabri (19') dështuan që të mposhtnin portierin De Gea). Nga rekordmenët anglezë, të cilët luajtën testin e fundit në Mynih përpara startit të sezonit (më 10 gusht kundër Leiçesterit), nuk u prodhua asnjë rast në pjesën e parë. Pas pushimit asgjë nuk ndryshoi në ekuilibrat e ndeshjes, por këtë herë Bajerni u shpërblye. Pas një goditjeje këndi të Tiagos, Martinez kërceu në shtyllën e parë dhe e dërgoi topin në këndin tjetër (59'). Pastaj Bajerni bëri një nga gjërat që e ka mësuar symbyllurazi: qarkulloi topin duke lodhur kundërshtarin. Leon Gorecka
humbi shansin më të mirë kur goditi pjesën e jashtme të rrjetës në minutën e 82-të, ndërsa në fund Roben shënoi edhe golin e dytë, por ai u anulua për pozicion jashtë loje. Një tjetër provë e shëmtuar për skuadrën e Murinjos, të cilin nuk e mbajnë më as nervat:
"Klubet që konkurrojnë me ne janë me të vërtetë të forta. Çelsi, Totenhemi dhe Siti kanë skuadra të mëdha, sepse investojnë shumë. Për të mos përmendur Liverpulin që po blen gjithçka. Nëse nuk përmirësojmë skuadrën, parashikoj një sezon të vështirë".