Cungu, me dy sulmues në Gjeorgji
Dilema edhe për portën, Maloku mund t'i zërë vendin Frashërit. Qaqi në balotazh me Hoxhën
jë Kukës ndryshe për turin e tretë të Ligës së Europës. Pas eliminimit nga Karabaku dhe paraqitjes zhgënjyese në ndeshjen e kthimit, trajneri Armando Cungu ka menduar të ndryshojë modul për sfidën e parë me Torpedo Kutaisin, që do të luhet të enjten në orën 19:00 në Tbilisi të Gjeorgjisë. Në bazë të asaj që trajneri ka provuar në seancat e dy ditëve të fundit, është vënë re se do të ketë të paktën tri ndryshime në formacion. E sigurt është mungesa e qendërmbrojtësit Albi Alla, i cili u ndëshkua me të kuq ndaj Karabakut. Probleme fizike në seancat e fundit kanë shfaqur portieri Stivi Frashëri dhe mesfushori Irakli Dzaria, por gjithsesi nuk bëhet fjalë për gjëra shqetësuese. Në fakt, dilemat e Cungut nisin që nga porta. Frashëri ka bërë një paraqitje të mirë deri më tani, pavarësisht se shkaktoi penalltinë e parë në Azerbajxhan. Gjithsesi, nuk përjashtohet mundësia që ndaj Torpedos të debutojë portieri kosovar, Maloku. Edhe në mbrojtje ka një
dilemë, pasi Qaqi është në balotazh me Rustem Hoxhën. Ky i fundit ka kaluar plotësisht dëmtimin dhe është gati. Nga krahët do të jenë Maliqi dhe Rrumbullaku, ndërsa i sigurt në qendër mbetet vetëm kapiteni Ylli Shameti, i cili po kalon një formë të mirë.
PLAKU NË STOL
Sebino Plaku është provuar në qendër të sulmit në të katra ndeshjet e deritanishme në Champions. Mirëpo, trajneri Cungu me sa duket nuk do të besojë te tiranasi ndaj Torpedos. Në stërvitjen e fundit ai provoi në majë boshnjakun
Haris Harba, ndërsa pas tij mozambikasin Arturo Rexhinaldo. Me skemën 4-4-1-1, në qendër të mesfushës do të jenë të përhershmit Dzaria dhe Musolli, ndërsa nga krahët Çyrbja dhe braziliani Melo. Rexhinaldo do të jetë pas sulmuesit kryesor Harba, i cili e
ka rritur gjendjen fizike dhe në Gjeorgji është ndoshta shansi i fundit për të. Nga boshnjaku pritet shumë, por iu bashkua Kukësit pas një periudhë dymujore pushim dhe kjo ndikoi në rendimentin e tij. TRAJNERI
Edhe vetë Cungu e pranon se Kukësi do të ndryshojë në ndeshjen e radhës, të vlefshme për Ligën e Europës. Në një bisedë për "Klan TV", ai theksoi se skuadra nuk do të mendojë vetëm për mbrojtjen. "Me Torpedon do të marrim më shumë iniciativë, jo se do ta nënvlerësojmë, pasi është një ekip i fortë, por nuk duhet vetëm të mbrohemi, duhet edhe të sulmojmë. Nuk është vetëm një test me Torpedon, pasi kampionati nis pas 2 javësh dhe duhet të kem idetë e qarta për lojtarët që kam në dispozicion", deklaroi trajneri shkodran i Kukësit.