Lushnja blindon portën me Bejten
Portieri: Jam gati për sfidën e re, trajneri Mikel Spaho e sheh si “gardianin” e vitit
Portieri Ibrahim Bejte pritet të jetë një nga pikat e forta të lushnjarëve për sezonin e ri 2018-2019. Portieri 29-vjeçar ka një karrierë 10-vjeçare në Kategorinë Superiore dhe në Kategorinë e Parë. Lushnja do të mbështetet te disa futbollistë të eksperiencës si Sefa, Xhafa, Bufasi, Alushi, Allkanjari dhe portieri Bejte. "Ekipi është i angazhuar 100% në përgatitjet që bën. Jemi të mo- bilizuar për të bërë sa më mirë këtë fazë përgatitore. Ekipi ka pësuar disa ndryshime nga viti i kaluar, por nuk na mungon eksperienca. Edhe lojtarë të rinj kanë shumë për të treguar. Mendoj se do të përforcohemi edhe me dy-tre lojtarë të tjerë dhe do të jemi pretendentë për edicionin e ri. Personalisht, jam i motivuar për të bërë më të mirën", u shpreh portieri Bejte. Ndërsa trajneri i portierëve të Lushnjës, Mikel Spaho, u shpreh: "Bejte është një portier cilësor dhe me eksperiencë. Kjo është një gjë shumë e mirë për skuadrën e Lushnjës. Jam i bindur se do të jetë portieri më i mirë i Kategorisë së Parë, që do të pësojë më pak se të tjerët", u shpreh trajneri Spaho. MERKATO - Pas ardhjes së Taullaut, Lushnja duket më e kompletuar në mesfushë, por klubi lushnjar mbetet në treg për një futbollistë të linjës së majtë dhe për një sulmues në krah të Sefës. Burime nga klubi lushnjar thanë për gazetën "Panorama Sport" se është folur me peqinasin Klejdis Branica. Sulmuesi 26-vjeçar ka luajtur në dy periudha të ndryshme në stadiumin "Roza Haxhiu". Në sezonin 20142015 dhe në dy edicione radhazi 2016-2018. Sezoni i Superiores nuk shkoi mirë për peqinasin, për shkak të një dëmtimi në shpatull. Pritet që Branica të luajë sezonin e katërt në Lushnjë. Me të gjitha gjasat, sulmuesi 26-vjeçar do t'u bashkohet sot në stërvitje lushnjarëve. Pas pushimit të së dielës, skuadra e drejtuar nga Ilir Gjyla ka në program zhvillimin e seancës së parë javore në orën 17:30. A.Alushi