Plas tek Apolonia, Miho përjashton Monen

“Theu disiplinën, askush nuk luan dot me këtë fanellë”

polonia ka luajtur ndeshjen e gjashtë miqësore kundër Luftëtarit të Gjirokastrës në Fier. Ka qenë një humbje infantile dhe pakujdesie e fierakëve e më pak meritë e Ymerajt, që ka shfrytëzuar mjeshtërisht gafën e mbrojtjes fierake. Është trajneri i Apolonisë, Marjol Miho, ai që analizon lojën e skuadrës së tij. "Duke pasur parasysh cilësinë e kundërshtarit dhe faktin që Luftëtari e ka nisur shumë më herët fazën përgatitore, jam pjesërisht i kënaqur me lojën e skuadrës. Po shkojmë drejt kolaudimit, por ende na duhet shumë përgatitje e po aq nevojë për një sulmues të mirëfilltë dhe shënues. Sa i përket ndeshjes me gjirokastritët, ne kemi pësuar një gol të pafalshëm dhe krejt për fajin tonë, por ekipi më vonë ka dëshmuar personalitet dhe ka reaguar mirë, duke e vënë në vështirësi të ndjeshme Luftëtarin".

MERKATO - Pas ndeshjes me Luftëtarin, Miho ka marrë dhe një vendim definitiv për tre futbollistë që ishin në provë tek Apolonia: Përgjini, Lezjan Çela dhe nigeriani Kabiru nuk bëjnë pjesë në planet e Apolonisë, dy të parët nuk kanë bindur, ndërsa Kabiru, veç një prove jo bindëse, ka qenë dhe pak i shtrenjtë ekonomikisht në kërkesat e tij ultimative, pa lënë aspak opsion diskutimi, çka i ka detyruar fierakët t'i bëjnë prapakthehu. I vetmi që

ka bindur me lojën e tij është mesfushori Erald Kolgega, ardhur nga Bylis i Ballshit, që ndaj Luftëtarit ka zhvilluar një lojë të mirë, duke u aktivizuar si titullar. Ndërkohë, konfirmohet dhe divorci definitiv me Arbër Monen, lojtarin e linjës së majtë, që u

vetëkthye tek Apolonia, por u largua për disa ditë pa dhënë informacion e pa leje nga klubi. Ndonëse vetë Mone ka kërkuar rikthimin, duke argumentuar se ka pasur disa probleme objektive, është trajneri Marjol Miho ai që ka vendosur veton për këtë lojtar, duke argumentuar: "Askush nuk luan dot me Apoloninë! Ky lojtar ka vendosur emrin e vet mbi të skuadrës, pa bërë asnjë njoftim për largimin e tij disaditor dhe kjo është thyerje e rëndë e disiplinës dhe kodit të klubit tonë", thotë Miho për "çështjen Mone", duke rikujtuar në formë aksiomatike thënien e tij që ditën e parë si trajner i Apolonisë: "Asnjë emër nuk peshon më shumë se skuadra!". Ndërkohë, me fillimin e javës në Fier pritet të mbërrijë për testimet e radhës 21- vjeçari Franc Bakalli, kavajasi që është aktivizuar në kampionatin rumun me Balotest ( 667' - 9 ndeshje), ndërsa vjet me Besën e Kavajës ( 128' - 4 ndeshje - 2 gola), minutazh i kufizuar për shkak dëmtimi. Njëherësh, nën "lupën" e vëzhgimit të Mihos, qysh nga kjo e hënë pritet një sulmues shënues i Kategorisë së Parë.