Andre Silva në shtesë, Milani mposht Barçën

Milani fitoi dje ndeshjen e fundit në turneun amerikan. Djemtë e Gatuzos bënë detyrën ndaj Barcelonës, një ekip i stërmbushur me djem të akademisë, ku përveç Malkolm, shkëlqeu edhe Puig. Goli kuqezi erdhi nga Andre Silva në sekondat e fundit të takimit, me portugezin që duket i motivuar pas ardhjes në ekip të Gonzalo Higuainit. Siç ndodhte edhe në dy ndeshjet e para (ndaj Junajtid dhe Totenhemit), kuqezinjtë vuajnë mbajtjen e topit të rivalëve dhe rrezikojnë shumë pak, por ndryshe nga takimet e tjera, ndaj Barçës, "Djalli" u tregua cinik dhe ndëshkoi rivalin në momentin më pak të pritshëm, teksa sfida dukej se po shkonte drejt barazimit. Ernesto Valverde mund të konsiderohet i kënaqur, pasi të rinjtë e tij ( mungonin thuajse 10 titullarë) bënë me dhimbje koke Milanin që luante me ekipin më të mirë të mundshëm. Semedo dukej sikur vraponte me dyfishin e shpejtësisë, ndërsa Rafinja bënte ligjin në një mesfushë ku Çalhanoglu luante jashtë roli, ndërsa Lokateli vërtetoi edhe një herë se nuk është ende gati për një skuadër të madhe. Milani, përsëri u kap pas Susos, driblimin e të cilit tashmë e njohin të gjithë, ndërsa Kutrone pa furnizimin e duhur, dukej një peshk pa ujë. Po aq e vërtetë është se janë miqësore vere, por fitorja jep moral dhe ndihmon psikologjikisht, ndaj për Gatuzon sfida ndaj katalanasve mund të konsiderohet jo edhe aq negative. Pozitiv fakti që Andre Silva rigjeti golin që mbase do të mundësojë qëndrimin në Milano edhe për një tjetër sezon. Diçka e tillë vështirë se mund të thuhet tani, por sidoqoftë goli i numri 69 kuqezi, rikthen Milanin në Itali me një buzëqeshje.