Gomez tërhiqet nga kombëtarja: Por kam moshën biologjike të Ronaldos
Sulmuesi 33-vjeçar i Shtutgartit i jep fund me Gjermaninë
Mario Gomez nuk do të luajë më për kombëtaren e Gjermanisë. Sulmuesi 33-vjeçar i Shtutgartit ka konfirmuar tërheqjen përmes një postimi në "Facebook". "Tani është koha të tërhiqem dhe t'u lë hapësirë shumë djemve të rinj dhe të talentuar për të pasur shansin të përmbushin ëndrrën e tyre dhe provojnë veten, të fitojnë eksperiencë dhe arrijnë më të mirën për Gjermaninë", shkruan lojtari që ka shënuar 31 herë me fanellën e "pancerave" në 78 ndeshje. Dhe Gomez nuk e kurseu as humorin pas vizitave mjekësore përpara sezonit, teksa e krahasoi veten me Kristiano Ronaldon: "Jam i lumtur t'iu lajmëroj se pas Kristiano Ronaldos, ndoshta unë jam lojtari i
dytë që zbuloj se mosha ime biologjike është 23 vjeç". Por, ai lë edhe një derë të hapur për rikthimin: "Pata një bisedë shumë pozitive me trajnerin e kombëtares. Vetëm nëse pas dy vitesh, në Kampionatin Europian për shkaqe të papritura, ai do të kërkojë ndihmën time, atëherë unë jam gati të përgjigjem". Në deklaratën
e tij të gjatë, Gomez shkruan ndër të tjera: "Për mua Kupa e Botës në Rusi ishte një ëndërr e madhe e bërë realitet, pavarësisht se eliminimi fatkeq në fazën e grupeve na ka zhgënjyer thellësisht të gjithëve. Gjatë gjithë karrierës sime unë kam mundur të luaj për kombëtaren gjermane. Por, kur e ndoqa i dëmtuar në
2014, kuptova më në fund se sa shumë më kishte munguar skuadra dhe se çfarë nderi i jashtëzakonshëm ishte për mua që të isha në gjendje që të luaja për një skuadër të tillë. Në Euro 2016 dhe Kupën e Botës 2018 unë mund të marr pjesë në dy turne të tjerë të rëndësishëm. Për këtë ndiej mirënjohjen maksimale, edhe pse gjatë turneut të fundit pritshmëritë nuk arritën të përmbusheshin. Fatkeqësisht, nuk mund të largohesh gjithnjë si fitues nga fusha. Koha ime në kombëtare nuk ishte gjithnjë e lehtë, jo gjithnjë e suksesshme e megjithatë shumë e bukur. Kam takuar shumë njerëz, me të cilët do mbetem shumë i lidhur. Do të qëndroj gjithnjë i lidhur me kombëtaren dhe si të gjithë gjermanët, unë jam një tifoz i madh i kësaj skuadre. I uroj ekipit, trajnerëve dhe gjithë skuadrës së tyre përreth vetëm më të mirën. Do ta shijoj këtë kohë me familjen time gjatë ndeshjeve ndërkombëtare dhe do t'i mbaj gishtat e kryqëzuar".