Dyshimet për trukim, UEFA do hetojë Luftëtarin
Nën akuzë edhe fitorja 8-0 e Atalantës së Berishës kundër Sarajevës
Luftëtari-Ventspils 3-3 do të hetohet nga UEFA si e dyshuar për trukim. Të paktën kështu raportojnë mediat rumune, të cilat kanë zbuluar dje se tri ndeshje në Ligën e Europës kanë dyshime të forta se janë manipuluar për qëllime bastesh. Sipas portalit rumun "fanatik.ro", por gjithashtu atij që përfaqëson të përditshmen "Sporturilor", ndeshja e zhvilluar në "Elbasan Arena" më 19 korrik, ka pasur luhatje të mëdha dhe është raportuar nga kompanitë e basteve. "Luftëtari shënoi me penallti, por afër fundit të pjesës së parë letonezët shënuan dy gola të shpejtë. Barazimi 3-3 erdhi në minutën e tretë shtesë. UEFA ka dhënë pezullimin më të madh në historinë e futbollit, pikërisht ndaj shqiptarëve të Skënderbeut, të cilët kishin manipuluar së paku 53 ndeshje", shkruante "fanatik.ro". Ndërsa, "Sporturilor" shkonte edhe më tej. "UEFA po heton, por nuk ka ende një konkluzion. Mirëpo, me shqiptarët dhe letonezët gjithçka është e mundur. Në sezonin 2013- 2014, klubi letonez Daugava humbi 1-7 në shtëpi nga Elfsborg, duke pësuar gjashtë gola në pjesën e dytë. Ai takim u hetua. Në Letoni ka shumë gjëra të dyshimta. Së pari, presidenti i Ventspils, Adlan Shishkanov. Biznesmeni 44vjeçar rus është i padëshiruar në Moldavi, pasi udhëhoqi dy klube njëkohësisht: Dacia dhe Zimbru. Donte të blinte edhe Karls Zeis Jena, por gjermanët ndienin diçka të dyshimtë, duke iu frikësuar pastrimit të parave". Sarajevo-Atalanta 0-8
UEFA filloi një hetim edhe për ndeshjen e kthimit në turin e dytë të Ligës së Europës mes Sarajevos dhe Atalantës, teksa italianët fituan 0-8 në Bosnjë. Në ndeshjen e parë, në Bergamo, gjithçka u mbyll 2- 2, me italianët që goditën vetëm dy herë portën dhe shënuan. Në Bosnjë, gjërat ishin krejt të ndryshme dhe Atalanta shënoi pesë herë që në pjesën e parë. Lëvizjet e portierit, që gaboi disa herë dhe mbrojtësve të Sarajevos, ishin shumë të dyshimta. Sipas "fanatik.ro", UEFA kishte marrë njoftimin se kjo ndeshje ishte një marrëveshje për qëllime bastesh. Vetëm në minutat e fundit, Atalanta pati 10 raste për gol. Në fushë për 90 minuta ishte edhe portieri i Kombëtares, Etrit Berisha.
Rio Ave-Jagiellonia 4-4
Një ndeshje tjetër e dyshimtë që po hetohet nga UEFA është Rio Ave-Jagiellonia, e cila përfundoi 4-4. Polakët mposhtën 1- 0 ekipin portugez në ndeshjen e parë, por në kthim ishte një festival golash. Polakët shënuan të parët, ndërsa Rio Ave përmbysi gjithçka në limitin e 45 minutave. Pas rezultatit 3-2 për vendësit deri në minutën e 72-të, ishin polakët që realizuan dy herë brenda shtatë minutave. Më pas erdhi barazimi në fund dhe gjithçka u mbyll me shifrat 4-4.