Luhatje të frikshme, ja çfarë ndodhi në sfidën e 19 korrikut

Luftëtari-Ventspils 3-3, e luajtur më 19 korrik në stadiumin "Elbasan Arena", nuk ishte një ndeshje normale në "gjuhën" e basteve ose më saktë, lëvizjeve të koeficientëve deri në absurd. Në fund konkludoi me një rrjedhë logjike të asaj që lojtarët po bënin në fushë. Aktorë të vërtetë, për më tepër kur shikon golin e tretë, që nuk ka aspak nevojë për koment. Që para se Luftëtari të shënonte golin e parë me penallti përmes Shkurtajt, kompanitë e basteve në Europë nisën luhatjet e kuotave jashtë çdo logjike. Kulmi arriti në minutën e 40-të, kur në vend që të kishte një ecuri krejt normale në kuotim, pasi Luftëtari po udhëhiqte 1-0, goli i radhës i letonezëve shkoi deri në 1.2. Dhe ndodhi ajo që pritej, Ventspils shënoi, por nuk mjaftoi me kaq. Thuajse i njëjti koeficient u mbajt edhe pas minutës së 40-të dhe sigurisht në fushë u konkretizua me golin e avantazhit të letonezëve dhe gjithçka për pjesën e parë u mbyll me shifrat 1-2. Lëvizjet e koeficientëve vijuan të ishin me një luhatje të pabesueshme në pjesën e dytë, aq sa kompania e njohur e basteve, "Bet365", u detyrua të hiqte çdo kuotim nga minuta e 54-t deri në të 64-ën. Kulmi arriti në minutën e 90-të, kur rezultati ishte 3-2 për Luftëtarin. Që shënon golin e radhës ekipi gjirokastrit ishte koeficienti 29, ndërsa për letonezët vetëm 1.72. Absurditeti qëndronte se koeficient më të ulët kishte barazimi në të njëjtën minutë, në vend që të kishte fitorja e vendësve. Kësisoj, shtesa prodhoi skenën e turpshme dhe Ventspils barazoi 3-3, pasi natyrisht u ndihmua nga lojtarët e Luftëtarit.