Flamurtari josh Albi Allën, pritet akordi
Kukësi mund ta lërë të lirë lojtarin vetëm pas Europës
Flamurtari kthehet në shpëtim për ishlojtarët e Kukësit. Skuadra veriore duket se është bërë "prehë" e Flamurtarit, sa i përket merkatos së futbollistëve. Mbas afrimit të brazilianit Kale (dhe pse ky i fundit nuk ka firmosur akoma për shkak të se Kukësi nuk i jep dokumentacionin), por dhe firma me Koliçin, tashmë vlonjatët kërkojnë t'u vjedhin nënkampionëve mbrojtësin e qendrës.
Bëhet fjalë për Albi Allën, të cilit drejtuesit e Flamurtarit i kanë ofruar një kontratë 2-vjeçare me rrogë mujore prej 5 mijë eurosh në muaj, nga të cilat 30 për qind e shumës futbollistit do i jepet në dorë. E nëse klubi nuk shkon në Kupat e Europës, jo vetëm mbrojtësit në fjalë, por të gjithë futbollistëve do t'iu mbahen 15 për qind e rrogës vjetore, objektiv i cili nuk diskutohet nga trajneri Ilir Daja dhe futbollistët e tij. Gazeta mëson ekskluzivisht se Albi Allën e ka bindur kjo ofertë dhe në parim e ka miratuar këtë dëshirë të vlonjatëve. Pas përfundimit të Kupave të Europës kur i përfundon
dhe kontrata me nënkampionët, kalimi i Albi Allës te Flamurtari, është një mundësi reale. "Shkes" për këtë mundësi kalimi te vlonjatët është bërë pikërisht ish-lojtari i Kukësit, Koliçi, i cili mbas prishjes së kontratës me Kukësin ka kaluar në radhët e Flamurtarit.
HISTORIA PLOT AKUZA E ULJE-NGRITJE
Albi Alla iu ribashkua Kukësit pikërisht në muajin gusht të vitit që shkoi, pas një vere plot përplasje, akuza e kundërakuza. Mbrojtësi mbas një sezoni mjaft të mirë në kampionat me Kukësin, fill mbas përfundimit të Superligës e fitimit
të kampionatit, deklaroi largimin nga ish-kampionët. Në atë kohë, pogradecari u prezantua te Larisa në Superligën Greke, por duke qenë se Kukësi nuk i lëshoi ITCS-në, firma me grekët ishte e kotë. Pas disa bisedave, Alla arriti marrëveshjen e re me Kukësin ku firmosi për një vit me dyfishim rroge. Por, sezoni që lamë pas ishte me shumë uljengritje të shoqëruara me dëmtime dhe kartonë. Alla koleksionoi vetëm 21 takime të luajtura, nga të cilat 18 si titullar. Roli i mbrojtësit lider në ekipin kuksian u zbeh, e për këtë shkak duket se 25-vjeçari do të kërkojë një aventurë të re larg Kukësit. Mbetet për t'u parë se si do shkojë kjo tentativë e vlonjatëve, pasi tashmë ka një "luftë" të hapur në distancë mes drejtuesve të dy klubeve.