Lautaro ndryshon Interin: Idhull? Dua më shumë

Jo vetëm "zëvendës" i Ikardit: Luaj edhe fantazist

Gjashtë ndeshje, madje të luajtura pjesërisht, tre gola e një asist. Flitet gjithmonë futboll veror, por "shkëndijat" e para të Lautaro Martinezit nuk kanë munguar. Në Leçe mori edhe komplimentet në vetë të parë të zv. presidentit Zaneti që, pas "asado"-s (nga spanjishtja: event i organizimit të një mbrëmjeje "barbecue"; Lautaro u ftua nga Ikardi), kompletoi "paketën" tipike të një futbollisti argjentinas të Interit. Edhe pse termi "tipik" nuk i përshtatet Lautaro Martinezit: nuk mund të cilësohet i tillë një lojtar që vetëm 19 vjeç i kërkon menaxherit të tij një nutricionist, pavarësisht se nuk ka probleme me peshën. Vetë "Demi", në dalje nga stadiumi "Via del Mare", i dha golit "veror" rëndësinë që meriton: "Ishte i bukur, jam i lumtur, por po shkon shumë mirë e gjithë faza përgatitore në tërësi. Po punojmë mbi ato që na kërkon trajneri: aksionet të nisen nga prapa, të pozicionohemi në bazë të mbrojtjes që kemi. Duhet të vazhdojmë këtë rrugë, sepse po i afrohemi nisjes së kompeticioneve dhe është e nevojshme të jemi gati". IMPAKT - Ambientimi në Milano vazhdon me ritme të larta: Lautaro ka gjetur shtëpi në Milano dhe ka nisur të studiojë gjuhën italiane (për momentin, megjithatë, është ndalur vetëm te përshëndetjet). Në atdhe tregojnë se është i pasionuar pas "stërvitjes së padukshme": kurimi i detajeve dhe një stil jetë që, në fund, bën diferencën te kampionët. Pavarësisht se vetëm 20 vjeç, në qendër të botës së tij është gjithmonë topi. Një aspekt që nuk ka ndryshuar, pavarësisht se kaloi në anën tjetër të oqeanit: "Ndryshimet mes Amerikës Jugore dhe Italisë mbeten, sepse këtu luhet një futboll më dinamik, më i shpejtë, edhe fushat kanë diferencë të madhe nga Argjentina. Por, presioni është i njëjtë, edhe puna e përditshme". Për momentin Mauro Ikardi, me të cilin kalon shumë kohë edhe jashtë "Appiano"s, është për të si një familje e dytë: "Që përpara se të transferohesha në Itali më telefononte, porsa mbërrita më kërkoi për të më pyetur se çfarë më nevojitej: ndihem me fat që kam një shok skuadre si ai. Gjithçka bën, brenda dhe jashtë fushës, më ndihmon të përmirësohem në jetën e përditshme".

JO "ZËVENDËS" - Rritet ditë pas dite, pasi nuk heq dorë nga puna. E ndoshta ka

"përzier" planet taktike të Spaletit ( e me shumë mundësi edhe ato të merkatos). Në letër ishte "zëvendësi" i Ikardit, por tani, nga moment që do rikthehet edhe Naingolan, Spaleti mund t'i gjejë një vend në modulin me dy fantazistë: "I vogël kam luajtur pas sulmuesve, por te Rejsing ai rol ishte i zënë dhe u spostova më përpara. Luaj kudo: sulmues i parë, i dytë, dhe fantasizit. Mjafton të jem i dobishëm". IDHULL - Për momentin te Lutaro bie në sy fiziku kompakt: 174 centimetra për 80 kilogramë. Për mbrojtësit është e vështirë t'i fitojnë dyluftimet: "Në Leçe pësova shumë faulle, po. Por kjo nuk më shqetëson, pasi vij nga një futboll fizik: ai argjentinas. Idhull i tifozëve? Kërkoj gjithmonë më shumë, por duhet ta meritoj". Nutricionisti, ndër të tjera, i ka hequr pijet e gazuara dhe gjithë ëmbëlsirat. Në njëfarë mënyre, me diçka Lautaro duhet të merret.