Raiola fluturon drejt Mançesterit dhe bën ofertën e Barcelonës për Pogbanë
Katalanasit ofrojnë 112 milionë € dhe kartonin e dy lojtarëve
Kur lëviz Mino Raiola, diçka e rëndësishme është duke ndodhur. "MundoDeportivo" raportoi se menaxheri i famshëm ka fluturuar drejt Mançesterit për t'i prezantuar Junajtidit ofertën gjigante të Barcelonës për Pol Pogbanë. Nga ana e mesfushorit francez, vullneti është që të largohet për herë të dytë nga "Old Trafford", për shkak të problemeve personale me trajnerin Zhoze Murinjo. Trajneri i Barcelonës, Ernesto Valverde, po mendon që të krijojë edhe një herë dyshen e mesfushës së Juventusit, Pogba-Vidal, këtë herë në "Camp Nou" dhe katalanasit janë përpara italianëve në garën për ta transferuar kampionin e botës. Oferta e Barçës - Në Spanjë janë të sigurt se Raiola ka trokitur në Mançester me ofertën e 112 milionë eurove plus kartonin e Jerri Minës dhe Andre Gomezit (Mançester Junajtid është duke kërkuar një qendërmbrojtës), por mbrojtësi kolumbian nuk pritet të jetë më pjesë e ofertës, pasi ka
arritur akordin me Evertonin. Oferta e Juves - Në Barcelonë janë të sigurt se ky operacion do të mbyllet me sukses, por tregohen të kujdesshëm për të mos e nënvlerësuar Juventusin (dhe as PSG-në për të thënë të vërtetën) dhe kapacitetin e Marotës dhe Paratiçit për të bindur 25-vjeçarin
që të rikthehet edhe një herë në Torino, nga ku u largua dy vite më parë për shifrën e 105 milionë eurove. Shifra që ofrojnë drejtuesit e kampionëve të Italisë është e ngjashme me atë që ka vendosur në tavolinë Barcelona, por emri që mund të përfshihet në operacion është ai i Miralem Pjaniçit. Ky i fundit vlerësohet shumë nga Alegri, por mekanizmat e lojës së "Zonjës" do të ndryshojnë këtë sezon pas transferimit të Bonuçit dhe tani trajneri italian është duke kërkuar një mesfushor me tipare më ofensive dhe fizikisht më prezent. Një gjë është e sigurt: Që në dy, maksimumi tri ditët e ardhshme, parashikohet të ndodhin shumë gjëra në këtë pjesë të fundit të merkatos angleze dhe italiane (në Spanjë gjithçka mbyllet në datën 31). Dhe gjithçka do të nisë nga blici i Raiolës. Që ashtu siç shkruan katalanasja "MundoDeportivo", sa herë që lëviz, paralajmëron një cunam...