Rama zbret në fushë, tifozët i kërkojnë titullin Partizanit
Për herë të parë grupi i plotë, punohet shumë nga krahët
Partizani vijon përgatitjet në kompleksin "Pepa" të qytetit të Elbasanit, aty ku është grumbulluar prej një jave nën drejtimin e dyshes Gega- Mehmeti. Të kuqtë e kryeqytetit janë suprizuar ditën e djeshme nga prezenca e drejtorit të përgjithshëm, Olsi Rama, i cili ndoqi nga afër stërvitjen. Përpara se të startonte seanca stërvitore, drejtori Rama bisedoi për disa minuta me teknikun Gega, teksa ishin ulur në një cep të fushës në praninë edhe të Genc Tomorit aty pranë. Rama nuk e la me aq bisedën me teknikun e të kuqve, teksa iu bashkua atij në mesin e fushës, ndërkohë që lojtarët ishin duke kryer ushtrimet që u kishte ngarkuar trajneri. Sigurisht, temë e diskutimeve ka qenë situata në skuadrën e Partizanit, teksa Gega diçka po i shpjegonte Ramës. Pse jo, tekniku shpreson te ndonjë përforcim në merkato, çka do të rriste më tej edhe konkurrencën në kampin e kuq. Pasi qëndroi për afro 45 minuta dhe pa stërvitjen e skuadrës, Olsi Rama në shoqërinë e të birit u larguan nga kompleksi sportiv, ndërkohë që ekipi vijoi me programin stërvitor.
GRUPI - Partizani iu rikthye në këtë mënyrë edhe përgatitjeve intensive, duke u dhënë lojtarëve ngarkesën maksimale në këtë periudhë përgatitoreje. Vijnë lajme të mira nga kampi i kuq, pasi për herë të parë grupi i lojtarëve ishte i plotë dhe nuk pati futbollistë që bënë stërvitje të diferencuar. Gega i ndau lojtarët në dy grupe duke zhvilluar një stërvitje në kushte loje, teksa me një skuadër i qëndronte vetë në kokë, ndërsa tjetrën ia kishte besuar zv. trajnerit Mehmeti. Në fund, u zhvillua një lojë me fushë të plotë. Shpresohet që deri në fillimin e kampionatit lojtarët të jenë në formën e duhur fizike, për më tepër që kalendari u ka rezervuar që në javën e parë një transfertë me kampionët në fuqi të Superiores, Skënderbeun.
KROSIMET - Siç ka ndodhur shpesh edhe në seancat e tjera stërvitore, Gega i ka mëshuar sërish krosimeve nga krahët. Lojtarët që kanë detyra për të marrë krahun në lojë u rreshtuan nga të dyja anët, ndërsa në qendër për të finalizuar aksionet ishin rreshtuar futbollistët e tjerë. Lojtarët nuk harruan të përgëzonin edhe njëri-tjetrin duke duartrokitur kur aksioni finalizohej me sukses, duke treguar se në skuadër ekziston një frymë optimiste në grup. Me sa duket, në staf besojnë se mundësitë më të mira për të shkuar te goli mund të vijnë pikërisht nga krosimet në krah.