Kaos total në Gjeorgji, Gjici: Racizëm ndaj Kukësit
Presidenti vendos 100 mijë euro premio në rast fitoreje ndaj Torpedos, Juventusi u jep në huazim për një vit mesfushorin Omar Ture
Çmenduri me Kukësin në Gjeorgji. Sikur të mos mjaftonte skandali i vizave, me tre lojtarë që mbetën në Shqipëri ( Rexhinaldo, Maliqi dhe Ethemi), skuadra ka hasur në një pritje të pazakontë nga vendësit. Pas udhëtimit TiranëStamboll dhe më pas direkt në Gjeorgji, ekipi mbërriti në 04:30 të mëngjesit të djeshëm në aeroportin e Tbilisit, por aty askush nuk ka denjuar ta presë nga klubi kundërshtar. Lojtarët dhe drejtuesit e Kukësit janë detyruar të ecin me çanta në duar rreth 200 metra, për të shkuar më pas në një parking, aty ku ishte "fshehur" autobusi i vënën në dispozicion për udhëtimin e ekipit deri në hotel. AKUZAT E KLUBIT Përmes një komunikate për shtyp gjatë paradites së djeshme, Kukësi denoncoi skandalin, teksa akuzoi për racizëm të gjeorgjianëve. "Pas një udhëtimi të gjatë dhe rraskapitës drejt Gjeorgjisë, mes shumë të tjerash janë krijuar dhe pengesa nga autoritetet gjeorgjiane. Klubi i Torpedos, si organizator dhe mikpritës i takimit, u tregua mospërfillës dhe krijoi pengesa në mënyrë që të mos bashkëpunojë me Kukësin, duke mos përmbushur kushtet minimale të aktivitetit të një rangu europian. Problemi më shqetësues për ne si klub vazhdon të jetë mospajisja me viza e lojtarëve si Rexhinaldo, Maliqi dhe Ethemi, edhe pse aplikimi është bërë në kohë. Autoritetet gjeorgjianë na premtuan për pajisjen me vizë të tyre, por tre lojtarët ngelen pa udhëtuar për në Tbilis. Ndërsa, portieri Faton Maloku, pasi ka qëndruar për rreth 7 orë në aeroportin e Tbilisit, i shoqëruar nga drejtori sportiv, Nderim Nexhipi, ka arritur më në fund që rreth orës 11:00 (dje) të bëhet i mundur kalimi i tij. Kontakti i parë me tokën gjeorgjiane nuk ishte aspak mikpritës dhe miqësor. Përveç problemeve me Malokun, ekipit tonë nuk i është bërë pritja nga zyrtarët e klubit vendës dhe nuk i është vënë në dispozicion eskorta e policisë, edhe pse ishte kusht që çdo lëvizje e delegacionit të Kukësit, bashkë me ekipin, të jetë e shoqëruar nga autoritetet gjeorgjiane. Klubi ynë dënon këtë indiferencë të ekipit vendës, që po bën çdo veprim me qëllim lodhjen e Kukësit dhe stafit të tij. Kjo sjellje nuk i shërben aspak lojës "fair play", duke e detyruar klubin e Kukësit të ndërpresë çdo komunikim me Torpedon. Madje, në shenjë proteste nuk morëm pjesë as në drekën zyrtare që organizon klubi vendës, duke vënë kështu në dijeni instancat e UEFA- s si dhe delegatin e ndeshjes. Klubi ynë ka hartuar një sëre masash për të mirëpritur Torpedo Kutaisin si mik, por duke parë pritjen që është ofruar nga ana e tyre, na kanë lëkundur besimin se e meritojnë vlerësimin dhe respektin tonë. Mes nesh kemi dhe një lojtar gjeorgjian, Irakli Dzaria, që është modeli i një futbollisti të mirëfilltë, që mund t'iu tregojë mirë bashkë-patriotëve të tij se si ne i presim miqtë. Kukësi, si pjesëmarrës në Ligën e Kampioneve, nuk mund të sillet si Torpedo, por do të zbatojë me rigorozitet rregulloren dhe plotësimin e kërkesave të tyre. Nuk është pak të thuhet që ndaj nesh po tregohet racizëm, që është elementi i parë i dënueshëm nga UEFA. Urojmë që ky kalvar mundimesh të shërbejë si një shtysë më e madhe për ne, për të luajtur fort dhe për t'u larguar me dinjitet nga Gjeorgjia. Një rast i tillë është i papërjetuar ndonjëherë nga ana jonë, edhe pse kemi luajtur me shumë republika të tjera ish- komuniste. I bëjmë me dije autoritetet përkatëse në Shqipëri, që të marrin parasysh vështirësitë që po na krijohen nga shteti gjeorgjian, duke marrë masat përkatëse", përfundonte komunikata e klubit të Kukësit.