Tomori rikthen Kaloshin, portieri kërkon Superioren
Gardiani lushnjar ka nënshkruar dje me skuadrën beratase
Tomori ka konfirmuar arritjen e marrëveshjes me portierin Mikel Kaloshi, i cili paraditen e djeshme është prezantuar nga administratori i klubit, Albano Ziu. Kaloshi është një ndër portierët më të besuar të beratasve për të mbrojtur katërkëndëshin, teksa insistimin për rikthimin e tij në radhët e Tomorit e kanë bërë drejtuesit më të lartë të kupolës. Nga burime të sigurta mësohet se me këtë çështje është marrë vetë administratori Ziu, teksa dy ditë më parë ka qenë në qytetin e Lushnjës për të biseduar më nga afër me 25-vjeçarin. Gardiani do të vazhdojë të jetë sërish pjesë e Tomorit, dhe pse në fillim të përgatitjeve, në mënyrë të çuditshme, nuk u thërrit nga stafi teknik. Megjithatë, "veton" e kanë vendosur krerët e klubit dhe tashmë kjo lëvizje u krye me sukses. Sakaq, në një prononcim ekskluziv për "Panorama Sport", portieri Mikel Kaloshi u shpreh i lumtur për këtë rikthim dhe tregon arsyet e kësaj lëvizjeje. "Në radhë të parë, ndihem mjaft mirë që do të luaj sërish me Tomorin. Ky do të jetë viti im i 4-t këtu, ku pa dyshim mund ta them me bindjen më të plotë se Berati është shtëpia ime e dytë dhe do të jap gjithçka nga vetja për treguar vlerat dhe objektivat e klubit. Insistimi ka qenë plotësisht i administratorit Albano Ziu dhe drejtuesve më të lartë të klubit, teksa gjej rastin t'i falënderoj për besimin e disatë që kanë treguar ndaj meje. Para dy ditësh kam pasur një takim kokë më kokë me administratorin dhe kam rënë parimisht dakord për çdo gjë, ku jo më larg se dje arrita që të nënshkruaj edhe kontratën. Synimi do të jetë Kategoria Superiore dhe diçka e tillë më është shprehur nga vetë drejtuesit", u shpreh Kaloshi. Eris Sylyku