Dinamo i jep leksion Erzenit, merr Lalën dhe Bytyçin

Klubi blu rikthen sulmuesin pas gjashtë vitesh

Dinamo tregon forcën, duke vërtetuar se në kampionatin e ardhshëm do të jetë një prej skuadrave pretendente për vendet e para. Blutë kanë fituar dje me rezultatin e pastër 3-0 në Shijak ndaj Erzenit, duke dominuar të gjithë lojën. Një takim ku blutë kanë realizuar me anë të Çemës, Morinës dhe Lalës. Ndërkaq, Dinamo vazhdon të jetë aktive në këtë merkato vere dhe dje ka zyrtarizuar afrimin e Endri Lalës. AFRIMET

"Endri Lala rivishet blu. 26vjeçari i dalë nga akademia dinamovite, rikthehet të luajë në ekipin "mëmë" në sezonin e ardhshëm, ku do t'i bashkohet Mario Morinës në repartin e sulmit. Lala rikthehet te Dinamo pas një eksperience te disa skuadra si Partizani, Kukësi, Mamurrasi e Laçi, ndërsa sezonin e fundit ishte pjesë e Erzenit. Për herë të fundit Lala ishte pjesë e ekipit në sezonin 2011- 12, në Kategorinë Superiore", bën të ditur klubi kryeqytetas në faqen e vet zyrtare në "Facebook". Gjithashtu, mësohet se dinamovitët kanë arritur akordin edhe me portierin Mario Bytyçi, i cili së fundmi ishte pjesë e Erzenit. Gardiani do të luajë për Dinamon në sezonin e ri. NDESHJA

Për sa i përket takimit, gjithçka ka nisur shumë mirë për Dinamon dhe është Çema që kalon blutë në avantazh në minutën e 20të. Shijakasit mundohen të

reagojnë, por e kanë të vështirë. Me startin e fraksionit të dytë, të dy trajnerët bëjnë zëvendësime të shumta. Në 10 minutat e fundit, Morina dhe Lala shënojnë edhe nga një gol për Dinamon. Erzeni duket se ka shumë probleme në këtë fazë përgatitore. S. Sulozeqi