Behrami: Xhaka e Shaqiri donin ta linin Zvicrën, i ndala unë

Mesfushori kosovar tregon prapaskenat e kombëtares

Valon Behrami është protagonisti absolut i medias sportive zvicerane në ditët e fundit, pas vendimit për ta përjashtuar atë nga kombëtarja helvete. Vendimi i bujshëm, i cili erdhi vetëm me një telefonatë nga trajneri i përfaqësueses, Vladimir Petkoviç, e fyeu shumë lojtarin, i cili nuk ngurroi që të dilte edhe në media dhe të shpërthente: "Ky nuk ishte një vendim sportiv, por thjesht politik ndaj meje dhe kjo më irriton shumë. Mendova se ajo e Petkoviçit ishte thjesht një telefonatë normale, por në fakt mua m'u tregua dera në mënyrën më të turpshme të mundshme. Dhe të mendosh që pas Botërorit kisha qenë unë ai që kërkova largimin, ndërsa ai m'u refuzua nga federata", u shpreh Behrami. Valoni ishte jo vetëm zemra e skuadrës, por edhe rekordmeni i Zvicrës, duke qenë i vetmi që kishte luajtur në 4 Botërorë të ndryshëm dhe në dy Europianë. Por, pas të gjithë kësaj çështjeje dhe sherrit që ai kishte pasur me presidentin e federatës zvicerane, si rrjedhojë e çështjes së lojtarëve me dy kombësi, Valon Behrami zbulon edhe prapaskenën e bujshme të radhës. "E gjithë zhurma që ndodhi për çështjen e 'shqiponjave' ndaj Serbisë dhe faktin që më pas u bisedua edhe në një mënyrë gati raciste ideja për të rimenduar prezencën në kombëtare të lojtarëve me dy kombësi, kanë qenë edhe Granit Xhaka dhe Xherdan Shaqiri që e menduan tërheqjen nga Kombëtarja e Zvicrës. Unë isha ai që tentova t'i qetësoj dhe të komunikoj me ta. Sekretari i Përgjithshëm ishte madje ai që më ftoi që t'i qetësoja shokët e mi dhe pranova. Këtë vendim e bëra sepse kam dëshirë të bashkoj njerëz dhe jo t'i ndaj ata, ndonëse të gjithë e kuptuan tashmë se çfarë më ndodhi mua pas shpatullave më pas", ishin fjalët e kosovarit Valon Behrami.