Mërgjyshi: I respektuam më shumë se duhet korçarët

Trajneri i Laçit, keqardhje për përmbysjen

Trajneri i Laçit, Artan Mërgjyshi, pas humbjes me përmbysje të Superkupës, deklaroi se i vjen keq që episodet shkuan kështu. Sipas tij, ekipi kurbinas duhet ta shfrytëzonte më mirë këtë avantazh. Në bisedën për "SuperSport", trajneri që debutoi në stolin kurbinas foli edhe për Myrto Uzunin, duke pranuar se tashmë klubi duhet të futet në merakto për të gjetur zëvendësuesin. "Më vjen keq, sepse në pjesën e parë e respektuam më shumë se ç'duhet Skënderbeut. Më pas, shënuam, por episodet ndryshuan historinë e ndeshjes", deklaroi fillimisht Mërgjyshi për të folur më pas për përmbysjen. "U zhvillua një ndeshje e bukur në pjesën e dytë. Pati aksione të mira, pati ritëm, mund të kishim edhe një rezultat tjetër, por Skënderbeu mbetet një skuadër eksperte. Ne jemi një skuadër e re dhe duhet ta shfrytëzonim më mirë këtë energji që kemi", deklaroi trajneri kryeqytetas.

MERKATO - Mërgjyshi beson se drejtuesit e Laçit do të arrijnë të gjejnë në kohë zëvendësuesin e Uzunit, si dhe një sulmues pas largimit të kroatit Vice Kendesh. I pyetur në lidhje me merkaton, trajneri konfirmoi se skuadrës i duhen lojtarë me eksperiencë. "Merkato vazhdon, unë nuk kam ndonjë informacion të sigurt që Uzuni është shitur, por është në tratativa. Duhet të marrim masa të luajmë edhe pa atë. Na vjen keq nëse largohet, por do i bëjë mirë atij. Ne duhet të marrim masa. Na duhen lojtarë më me eksperiencë, por klubi besoj po punon për t'i gjetur në kohë, në mënyrë që të jemi sa më të kompletuar në prag të kampionatit. Koha është e shkurtër, por do t'ia dalim", përfundoi Mërgjyshi, për të cilin ishte Superkupa e dytë e humbur në krye të një skuadre, pasi më parë e kishte bërë si trajner i Dinamos. Ndërkohë, në historinë e vet, Laçi ka fituar vetëm një herë Superkupën, pikërisht në vitin 2015 kundër Skënderbeut pas goditjeve të 11-metërshave.