Gjici shkund stafin, ja situata e kontratave
Pas ndeshjes me Torpedon priten të tjera afrime dhe largime
Presidenti i Kukësit, Safet Gjici, ka zhvil luar dje një mbledhje me drejtorin sportiv, Nderim Nexhipi, si dhe trajnerin Cungu me stafin, të cilëve u ka kërkuar llogari për ndeshjen me Torpedon, që verilindorët e humbën me rezultatin e thellë 5-2. Kreu i klubit ka qenë mjaft i mërzitur dhe i zhgënjyer për rezultatin e thellë të pësuar në Tbilisi e për këtë arsye i ka kërkuar llogari stafit. Këta të fundit kanë dhënë shpjegimet e tyre teknike për çdo lojtar dhe secilin sektor dhe arsyet pse çaloi ekipi, si në lojë ashtu dhe në rezultat. Faji i është vënë mbrojtjes, sidomos krahut të djathtë të përfaqësuar nga Hoxha, por kritika kanë marrë gjithë sektorët e tjerë. Presidenti Gjici ka shfaqur hapur zhgënjimin ndaj lojtarëve, por dhe nga stafi. Ndërkohë që janë sqaruar pozicionet e drejtorit Nexhipi dhe trajnerit Armando Cungu, ku të dy u bënë protagonistë me deklaratat dhe kundërdeklaratat e tyre. Trajneri shkodran pas ndeshjes kritikoi hapur lojtarët dhe vuri në dyshim profesionalizmin dhe cilësinë e tyre. Gjithashtu, shprehu dukshëm mospëlqimin për disa lojtarë të ardhur në merkaton e verës dhe nëse ekipi nuk do forcohej, ai do rishikonte pozicionin. Më pas ishte drejtori sportiv Nderim Nexhipi ai që theksoi se deklaratat e trajnerit Cungu ishin të nxituara dhe se ekipi i Kukësit është pretendent kryesor për titull. Më pas, palët ranë dakord dhe janë të kënaqur nga dy përforcimet e reja, Ardian Cuculi dhe Omar Ture, por mbas përfundimit të sfidës me Torpedon, sido që të dalë ajo, do ndërhyjnë sërish në merkato. Stafi është justifikuar gjithashtu me lodhjen dhe manovrat e vizave të gjeorgjianëve, ku ekipi u dëmtua direkt. Në mbledhje nuk kanë munguar dhe komentet pozitive, ku Haris Harba ka qenë në qendër te vëmendjes pas golit të shënuar. Në fund, presidenti Gjici ka kërkuar që në ekip të ketë harmoni dhe të punohet shumë, si dhe kërkoi me çdo kusht kualifikimin ndaj gjeorgjianëve.
KONTRATAT
Sa i përket merkatos, pikat mbi "i" janë vendosur edhe për largimet, ku njëri mes Albi Allës dhe Rustem Hoxhës do largohet. Brenda javës njërit prej të dyve do t'i komunikohet largimi. Sa u përket largimeve, Sebino Plaku pas sfidës me Torpedon pritet të shpallë "divorcin" me verilindorët dhe Kamza është "prapa dere" për të marrë shërbimet e tij. Roxher Xhunior është futbollisti tjetër që pritet të largohet, pasi ai nuk ka bindur me formën e tij. Ndërkohë, sa u përket rinovimeve, është zgjidhur çështja me Besar Musollin, i cili mendonte se i përfundonte kontrata mbas Kupave të Europës, por sipas klubit, zv.kapiteni ka dhe një vit kontratë. Ky fakt ka surprizuar jo pak mesfushorin kosovar, i cili është një nga shtyllat e ekipit. E njëjta gjë vlen dhe për Simon Rrumbullakun, i cili ka pasur pretendime se i përfundonte kontrata pas Kupave
të Europës, por dhe ai, sipas klubit, ka edhe një vit kontratë. Donjet Shkodra gjithashtu nuk ka pasur shumë hapësira, por kontrata e tij është dhe për vitin e ardhshëm. Shkodra është futbollisti më i paguar i ekipit me 7 mijë euro në muaj. Mesfushori ka qenë titullar absolut në kohën kur drejtonte Peter Pakult, por me ardhjen e Cungut kuotat e tij në fushë janë zbehur, për shkak se minutazhi ka qenë mjaft i vogël, por potenciali i Shkodrës nuk vihet në dyshim. I vetmi që është pa kontratë është kapiteni Ylli Shameti, të cilit klubi i ka ofruar një kontratë të re, e para ndeshjes me Torpedon, me shumë gjasa, lideri i ekipit pritet që të pranojë ofertën e drejtuesve e të nënshkruajë. Shameti shikohet si i pazëvendësueshëm në radhët e verilindorëve, ku së bashku me Cuculin do formojnë dyshen e qendrës.