Sh ipëria shpërdoron, mundet nga Ka akistani
Kombëtarja bën një paraqitje dinjitoze, në fund “flirton” me barazimin
Shqipëria zhvilloi dje ndeshjen e parë në grup, të vlefshme për Kampionatin Europian të Minifutbollit, që po mbahet në Kiev të Ukrainës. Kuqezinjtë startuan me humbje në këtë turne, pasi u mundën me rezultatin 1-0 nga Kazakistani, ku vendosi goli i Abdrasilov në minutën e 8-të. Por, duhet theksuar fakti, që Shqipëria nuk vinte në kushtet më të mira në këtë takim, pasi kuqezinjtë kanë mbërritur në Kiev, vetëm 8 orë para fillimit të ndeshjes, për shkak të vonesave të avionit, gjë që ndikoi jo pak në formën e skuadrës, duke bërë që mos të shprehen në maksimumin e tyre në fushë. Megjithatë, kuqezinjtë bënë një paraqitje të mirë dhe nëse do të kishin pak më shumë fat në fundin e takimit mund të merrnin edhe barazimin. Ndërkohë që kundërshtarët nga Kazakistani janë një skuadër me eksperiencë të madhe në arenën ndërkombëtare, madje në vitin 2016 janë shpallur edhe Kampionë Europe.
NDESHJA - Shqipëria vendoset në gjysmëfushën e saj, pasi trajneri Koçi ka zgjedhur si strategji pritjen në mbrojtje, për të tentuar ta godasë kundërshtarin në kundërsulm. Në minutat e para kuqezinjtë provojnë me kapitenin Hysenbelliu dhe Mërtirin, por pa mundur ta rrezikojnë seriozisht portën e kundërshtarit. Kazakët janë më të qartë në lojë dhe në minutën e 8-të gjejnë golin e avantazhit me anë të Abdrasilov, i cili godet fort me të djathtën nga rreth 20 metra, duke mposhtur portierin Bregasi. Pas golit, kuqezinjtë nuk arrijnë të reagojnë dhe vuajnë sulmet e shumta të kundërshtarëve. Në të 14-ën, Shqipëria rrezikon të pësojë golin e dytë, por është me fat, pasi topi ndalet nga shtylla pas një aksioni të bukur të Kazakistanit. Skuadrat shkojnë në pushim me rezultatin 1-0. Në pjesën e dytë është përsëri Kazakistani që sulmon dhe kuqezinjtë nuk arrijnë të ndërtojnë aksione të rrezikshme. Rasti i parë për Shqipërinë vjen në minutën e 31-të, kur Mërtiri pas një aksioni personal godet fort, por topi përfundon ngjitur me shtyllën pingule. Në minutën e 40-të Shqipëria ka një mundësi të artë për të barazuar, por Dushku nuk arrin të finalizojë saktë një aksion të bukur të kuqezinjve, kjo edhe për meritë të portierit kundërshtar, i cili bën një ndërhyrje vendimtare, duke shpëtuar
portën nga një gol i sigurt. Në minutat shtesë është sërish Dushku që i afrohet golit, por përsëri portieri kazak tregohet i vëmendshëm, duke dalë në momentin e duhur nga porta dhe rezultati nuk do të ndryshojë deri në fund, ku gjithçka mbyllet 1-0 në favor të Kazakistanit.