Liverpuli super, Siti i tregon muskujt Arsenalit
“Të kuqtë” sigurojnë fitoren e 500-të në histori
Në ndeshjen hapëse të ditës së djeshme, Liverpuli dhuroi spektakël duke fituar 4-0 ndaj Uest Hemit. Djemve të Jurgen Klop u mjaftuan më pak se 20 minuta për të zhbllokuar takimin, me tashmë të zakonshmin Mohame Salah. Një gol tejet i thjeshtë për egjiptianin, të cilit iu desh vetëm të shtynte në rrjetë një pasim të saktë nga ana e Robertson. Për t'u theksuar në këtë gol ishte nisja e aksionit nga Nabi Keita, një nga blerjet e reja të të "të kuqve" gjatë merkatos së sivjetshme. Miqtë tronditen, por arrijnë të qëndrojnë në lojë deri në fundin e pjesë së parë, kur Sadi Mane realizon golin e dytë të takimit. Përsëri protagonist Robertson që hap lojën në krah nga ku Milner me një veprim atletik arrin të krosojë në zonë. Senegalezi, ashtu si Salah, shënon një gol shumë të ngjashëm për nga thjeshtësia dhe Liverpuli shkon në pushim më i qetë. Fraksioni i dytë i lojës nis me Uest Hemin që mundohet të marrë
iniciativën, por ofensiva e tyre zgjat deri në minutën e 53-të. Në këtë, moment Mane ngjitet përsëri në katedër, duke shënuar pas asistit të Roberto Firminos. Numri dhjetë liverpulas është në pozicion jashtë loje në momentin e nisjes për të marrë pasimin, por ky detaj nuk vihet re nga asnjëri prej arbitrave. Goli i Starrixh në minutën e 88-të vulos shifrat përfundimtare të takimit me Uest Hemin që duhet të falënderojë portierin Fabianski, pasi ndeshja mund të kishte përfunduar me një rezultat edhe më të thellë për ekipin nga Londra. Polaku realizoi praktikisht tri mrekulli vetëm në pjesën e parë
duke i mohuar dy herë golin Arnoldit dhe një herë Salahut. Debutimet e brazilianëve Anderson dhe Alison ishin diametralisht të kundërta, me mesfushorin e Uest Hemit autor të një prove të dobët, teksa portieri i ardhur nga Roma kaloi një pasdite prej tifozi pa pagesë në "Anffield".