Allmuça dhe Sefa: Gati për hapin e madh
Dinamo ka vetëm një mision këtë sezon, ngjitjen në Kategorinë Superiore. Kryeqytetasit duan që t'i japin fund agonisë në të Parën dhe shpresojnë që ky do të jetë viti i duhur. I këtij mendimi është edhe Igli Allmuça, i cili edhe pse e pranon që do të jetë e vështirë, thekson që janë gati për të hedhur hapin e madh. "Kategoria e Parë është e vështirë, ndryshe nga se duket. Jemi ambientuar dhe do bëjmë një hap cilësor për të tentuar diçka të madhe. Kush gabon më pak, kush është më serioz, do të mund të realizojë objektivin. Nuk ka skuadra që bëjnë çudira këtu apo kanë diferenca të mëdha. Vazhdimësia të bën të kesh rezultate të mira dhe të pretendosh", është shprehur fillimisht për "SuperSport", numri një i pankinës kryeqytetase. Allmuça ndalet edhe te gjendja e ekipit në këtë fazë përgatitore, ndërsa vlerëson paraqitjen në ndeshjet testuese. "Skuadra ka gjendje të mirë, jemi shfaqur mirë në ndeshjet miqësore, ka dëshirë dhe shpresojmë që kampionati të tregojë forcën tonë të vërtetë", përfundoi tekniku. Optimist shfaqet edhe një nga afrimet e kësaj vere. Jetmir Sefa, i cili ka dalë kampion në elitë me Tiranën dhe Skënderbeun, kurse vjet ishte pjesë e Lirisë së Prizrenit në Kosovë, këtë vit do të jap kontributin e tij te Dinamo. Ai beson se mund t'ia dalin, por hapur edhe thotë që skuadra ka nevojë për afrime. "Ekipi ka djem të rinj dhe të mirë, që pretendojnë të dalin lart. Shpresojmë që të merren edhe lojtarë me eksperiencë dhe të luftojmë për Superioren. Dinamo është ekip i madh dhe shpresojmë të arrijmë objektivin Superiore", tha Sefa.