Sherr që në start, dështon eksperimenti pa policë
Bilanc “lufte” në ndeshjen që duhet të ishte reklamë për futbollin shqiptar, stjuartët përfundojnë në spital bashkë me tifozët
Dhunë që në start > Nuk jemi në Af rikë, por në një vend të Europës të quajtur Shqipëri dhe mbi të gjitha në një stadium që përfaqëson një qytet me kulturë. Por, tifozët nuk duan t'ia dinë se është vetëm java e parë e kampionatit dhe s'mund të flitet aspak për rivalitet sportiv, por thjesht për një ndeshje që duhet të ishte reklamë për futbollin shqiptar. Skënderbeu-Partizani degjeneroi në dhunë mes tifozëve dhe u ndërpre 16 minuta. Dhe kjo ndodhi në Korçë, ku të gjithë shprehen pas ndeshjes se është një fushë ku luhet futboll, pasi ka vite që ka krijuar standarde. Nëse dje për 72 minuta lojë gjithçka ka qenë korrekte dhe u duk sikur largimi i policëve kishte qetësuar tifozëritë, më pas ndodhi ajo që nuk pritej. Gjithçka degjeneron në dhunë, me lojën që u ndërpre dhe dy tifozëritë që nisën të përleshen me njëratjetrën. Kur sapo kishte kaluar minuta e 70-të, tifozëritë nisën të sulmojnë njëra-tjetrën me flakadanë. Madje, në sektorin e ultrasve të Partizanit, pati gurë edhe ndaj automjeteve të ambulancës dhe zjarrfikëses, të cilat u detyruan të largohen nga ajo pjesë e pistës ku po qëndronin. Gurët nga tifozët e kuq nuk u drejtoheshin vetëm mjeteve në pistë, por edhe tifozëve në tribunën B të stadiumit. Këta të fundit, që ishin vendës, u kundërpërgjigjen me të njëjtën monedhë. Këtu precipitoi gjithçka, pasi rreth 30 stjuartë në të gjithë stadiumin nuk mund të mbanin nën kontroll 5 mijë veta. Ndërhyrja e policisë, që qëndronte jashtë impiantit sipas ligjit të ri, vonoi dhe ndodhi ajo që nuk duhet të ndodhte. Tifozët hodhën sende të forta në distancë dhe arritën deri atje sa zbresin në fushë, duke u përleshur me njëri-tjetrin. Situata doli jashtë kontrollit dhe për shumë minuta në stadium pati një panik të madh. Drejtuesit e dy klubeve nuk dinin si të reagonin, pasi turma ishte e pamundur të zmbrapsej. Familjarët që ndodheshin në tribunën B, zbritën në pistë për të gjetur një vend më të sigurt, ndërsa beteja e sendeve të forta vazhdonte. Vetëm pas 16 minutash përleshjeje dhe shkatërrim stolash në pjesë të ndryshme të stadiumit, situata u normalizua dhe tifozët u rikthyen në tribunat përkatëse. Në këtë moment nisën të bëhen edhe bilancet e "luftës".
TË PLAGOSURIT
Të dhëna të sigurta bëjnë me dije për "Panorama Sport" se janë lënduar katër stjuartë në sektorin ku ndodheshin tifozët e Partizanit. Dy prej stjuartëve kanë pësuar të çara në kokë dhe krah. Në kampin e tifozëve, janë tre të Partizanit dhe dy të Skënderbeut, që janë gjakosur në pjesë të ndryshme të trupit. Disa prej tifozëve që kishin plagë të lehta morën ndihmë nga stafi mjekësor i Skënderbeut dhe Partizanit. Në gjithë këtë bilanc "lufte", ironia është se deri dje në mbrëmje vetëm një person u shoqërua në polici. Gjithsesi, sot mbetet të verifikohet se kush prej tifozëve ka përfunduar në komisariat pas përleshjes.