Gjyqtari zhvesh Shehin në debutim, ora elektronike i bën lëmsh tifozët
Olsi Rama shfaqet me tutat e Hellas Veronës, ja çfarë nuk u pa
Përveç tensionit dhe dhunës nga tifozët, sfida hapëse e kampionatit pati edhe momente të tjera pikante që nuk janë parë në televizion. "Panorama Sport" evidenton momentet më interesante brenda dhe jashtë fushës...
* Në Korçë çelet edicioni i 80-të i kampionatit të futbollit dhe gjithçka nis me një ceremoni para startit të takimit mes kampionëve në fuqi të Skënderbeut dhe Partizanit si sfidues. Sfida nis menjëherë elektrizuese në tribunë ku nuk mungojnë që në fillim, pa startuar takimi, ofendimet në distancë mes dy tifozërive. Nëse tifozët e nisin me sharje e ofendime këtë sezon futbollistik në dy pankinat respektive ka korrektësi e përqafime. I tillë është takimi mes Shehit dhe Gegës.
* Starti i sezonit të ri në Korçë vjen me ndryshime dhe mangësi në të njëjtën kohë. Ajo që binte në sy menjëherë ishte mungesa e megafotos së Tefik Osmanit në tribunën D të stadiumit, e hequr pak ditë pasi korçari zgjodhi të vijonte karrierën në Durrës. Ndërsa, në anën tjetër ora elektronike në stadium nuk funksionoi për asnjë sekondë, duke u kthyer në shqetësim për gazetarët kryesisht, por edhe për tifozët.
* Një stadium i mbushur në masë të madhe ishte ai i ndeshjes së djeshme në Korçë ku më shumë se 5000 sportdashës zgjodhën të shihnin ndeshjen mes Skënderbeut dhe Partizanit nga shkallët e stadiumit "Skënderbeu". Edhe në tribunat VIP nuk munguan të zakonshmit me Ardjan Takajn dhe Arlind Boshkun në kampin bardhekuq të shoqëruar nga Filo e Fakiç. Ndërsa, në anën tjetër të kuqtë kishin mungesën e madhe të Gaz Demit, por Olsi Rama dhe Genc Tomorri qëndronin në ballë të të kuqve.
* Ndeshja nisi e qetë dhe duket se Skënderbeu ishte më kërkues në fushë, duke luajtur me zemër, ndërsa Shehi vazhdoi të udhëhiqte në pistë gjatë gjithë kohës në këmbë të tijtë, duke treguar stimul të madh dhe dëshirë po aq të madhe për të qenë triumfues në anën e tij. Gega nga krahu tjetër më i përmbajtur jepte vazhdimisht këshilla.
* Vlen të theksohet momenti kur pati një përplasje në distancë mes Trashit dhe Gegës, e cila u mbyll në moment.
* Arbitri i katërt, disa minuta pas fillimit të ndeshjes, detyron Shehin të zhvishet. Trajneri i Skënderbeut detyrohet të heqë xhaketën e zezë dhe të qëndrojë me këmishë e kravatë në fushë, pasi ngjyrat ngatërroheshin me Partizanin. Gjithsesi, Shehi duket se nuk e ndien aspak të ftohtin në fushë dhe qëndron ashtu gjatë gjithë ndeshjes.
* Në momentet kur takimi u ndërpre, Shehi mblodhi lojtarët së bashku me stafin dhe u kërkoi të ruanin qetësinë dhe të mos prekeshin nga ky incident emocionalisht. Kjo për vetë faktin se trajnerit të bardhekuqve i është kujtuar koha kur ishte lojtar dhe ndeshja e Superkupës me Tiranën apo edhe Beogradi me Kombëtaren, prandaj donte që ekipin ta mbante të qetë në atë moment. * Gjatë përplasjeve të dy tifozërive nuk kanë munguar as ofendimet dhe akuzat drejt drejtuesve të kuq, që i quanin përgjegjës të asaj çka po bënin tifozët e Partizanit.
* Në momentin e penalltisë së fituar nga Bregu, gëzimi i stolit bardhekuq ka qenë i madh teksa të gjithë kanë vrapuar deri në kufijtë e fushës. Më pas, me kthimin në gol nga ana e Muzakës, festa ka qenë legjitime.
* Protesta ka pasur në shumë raste nga lojtarët e Skënderbeut për sjelljen dhe vendimet e kryesorit dhe asistentëve të tij, sidomos gjatë pjesës së parë kur megjithëse Skënderbeu dilte në një aksion të rrezikshëm, anësori vendosi të sinjalizojë faull për Vangjelin, duke mos lejuar avantazhin. Kjo solli reagim nga ana e Radasit që dukej më i revoltuari nga bardhekuqtë.