"Skënderbeu më lart, ja çfarë i thashë ekipit pas dhunës"
Aventura e Orges Shehit si trajner i Skënderbeut ka nisur në mënyrën më të mirë të mundshme, ku pas fitores së Superkupës ka mposhtur edhe Partizanin në start. Në intervistën e dhënë pas ndeshjes për "SuperSport", Shehi pohoi se ekipi i tij ishte më lart se kundërshtari, por pret akoma më shumë nga të tijtë. Sa i përket dhunës, ai e quan të papranueshme, pasi sporti i bashkon njerëzit.
DHUNA- "Sinqerisht shpreh keqardhje që në këtë vit ndodhin situata të tilla. Futbolli është sport që bashkon. Ka bashkuar klasa politike, shtresa njerëzish dhe duhet të bashkojë tifozëritë. Sinqerisht, nuk duhet të ndodhë, jo vetëm këtu, por askund tjetër kjo që ndodhi sot (dje). Të them të drejtën, loja jonë ndryshoi pas asaj që ndodhi mes tifozërive. U kam kërkuar lojtarëve që të mos ndikohen nga situata dhe të ruajnë qetësinë. Kjo për shkak se m'u kujtua menjëherë ndeshja e Superkupës me Tiranën para disa vitesh, ku pas një situate të njëjtë ne e vuajtëm shumë në fushë dhe humbëm takimin".
TAKIMI- "Një fitore me vlera, e kam thënë edhe para ndeshjes, luajmë me një rival direkt. Më vjen mirë që skuadra vijon kështu, nuk kishim ritmin e duhur, por fituam edhe ndaj
Laçit që kishte bërë katër ndeshje në Europë. Edhe sot (dje) ishim më lart se kundërshtari. Më vjen mirë që djemtë janë të karikuar dhe me uri. Kemi punuar dhe kishim informacion që Partizani do të ndryshonte. Me atë formacion që bëri në triangolare, ndryshoi gjatë lojës".
SITUATA E EKIPIT- "Kemi pasur probleme me federimet, Ajzerajn dhe Gavazajn i kemi pasur vetëm sot. Në këto ditë të fundit duhet të plotësohemi. Kemi nevojë për merkato, sepse nuk mund të themi që jemi të kompletuar. Kemi disa lojtarë që nuk kanë minutat e duhura, lojtarë të rinj si Krasniqi, Demte, Gripshi dhe Abazi, që kanë kohë pa u aktivizuar. Me kalimin e kohës do të marrin besim, normale që nuk janë 100%.Ata janë jo më kot pjesë e Skënderbeut. Unë besoj se ata do të rriten. Kanë besimin tim të plotë sepse janë futbollistë me cilësi. Do të ndjekin shembullin e lojtarëve të vjetër që janë profesionistë nga të gjitha anët".
RAPORTI ME LOJTARËT- "Nuk ka qenë e lehtë, në stërvitje nuk jemi më shokë. Pas stërvitjes jemi miq dhe vëllezër. Për këtë duhen falënderuar, pasi janë sjellë si profesionistë të vërtetë. Ata dinë t'i ndajnë situatat brenda dhe jashtë fushës. Ju kam thënë më thërrisni profesor në stërvitje, ndërsa jashtë Gesi", u shpreh trajneri Shehi.