Apolonia kërkon një "bomber", sot miqësorja e dhjetë
Zv.trajneri Argjendari: Jemi thuajse të plotësuar
Sokol Argjendari është bashkëshoqërues besnik i Marjol Mihos, pasi të dy kanë drejtuar sezonin e kaluar Albpetrolin e Patosit dhe këtë edicion ka qenë trajneri, që e ka kërkuar ta ketë në rolin e zëvendësit. Në një bisedë për gazetën, numri dy i pankinës komenton gjendjen e skuadrës, por nuk ngurron që të flasë edhe për problemet. "Skuadra po ecën shumë mirë dhe grupi është thuajse i plotësuar. Po konsolidohemi në filozofinë e lojës dhe në aspektin tekniko- taktik. Mbi të gjitha, po forcojnë ndjeshëm mentalitetin fitues. Kemi probleme në sulm, por nuk është shprehja e duhur se çalojmë. Po, na intereson mbi të gjitha një lojtar agresiv në vijën e parë, që di ta godasë mirë portën, golashënues të mirëfilltë që të shënojë shumë gola. Gjithsesi, edhe nëse nuk arrijmë të gjejmë një kualitet të tillë, ne kemi lojtarë shumë të mirë në përbërje, të cilët janë të gatshëm të marrin përsipër vijën e parë. Mjafton të shihni miqësoret tona të deritanishme e do të bindeni për këtë gjë. Sa i përket ndarjes së grupeve, Grupi B është realisht i fortë dhe me ekipe që pretendojnë ngjitjen. I respektojmë të gjithë kundërshtarët, gjithsesi kemi bindjen se Apolonia i ka të gjitha mundësitë për të qenë ' koka' e grupit në fund të kampionatit", përfundoi zv. trajneri. Këtë të shtunë, Apolonia do të luajë dhe ndeshjen e dhjetë miqësore gjatë kësaj faze verore, duke pritur si kundërshtar në Fier debutuesen e Kategorisë së Parë, Vorën, ndeshje që do të startojë në orën 17: 30. Bujar Rama