Leonardo: Juve cikli mbaroi, Bakajoko fiksimi i Gatuzos
Merkato e Milanit mbyllet me 13 operacione. Suksesi i punës së kësaj vere do të matet në fund të sezonit. Leonardo, në rolin e drejtorit teknik, është munduar të bëjë një bilanc paraprak të punës së tij gjatë konferencës për shtyp që parapriu prezantimet e treshes, Bakajoko-Kastijeho-Laksalt.
Jeni në detyrë vetëm prej tri javësh. Si e gjykoni punën tuaj?
Jam shumë i lumtur dhe nuk ndihem aspak i lodhur. Kisha një objektiv dhe mendoj se kemi punuar mirë, duke i ofruar trajnerit një organikë të ekuilibruar në numër, humor dhe cilësi. Grupi ishte i mirë, por mendoj se ia kemi rritur vlerën. Detyra e radhës është të përmirësohemi të gjithë me klubin që dikton rregulluat për t'u ndjekur.
A ishit vërtet afër transferimit të Milinkoviç-Saviçit?
Të jemi të sinqertë, nuk ka pasur bisedime konkrete. Kam folur një herë me agjentin e lojtarit, por ishte një bisedë miqësore sepse e kam mik prej vitesh. E dija që në fillim që Saviç për mundësitë tona ekonomike ishte i paarritshëm. Po të shikoni me kujdes, do të vini re se të gjitha afrimet e Milanit, kanë korresponduar me largime. Nuk ka qenë e lehtë, por kemi punuar si duhet duke mos bërë asnjë ndryshim në nivel borderoje.
Pati ndonjë lojtar që ishte fare pranë, por më pas nuk erdhi? Jo, edhe sepse duke ardhur me vonesë, nuk kisha kohë të eksperimentoja, ndaj zgjodha rrugë disi më të sigurta.
Mbase është thjesht çështje numrash, por a mjafton vetëm Bakajoko?
Na duhej një mesfushor dhe e morëm. Profili i Tiemues entuziazmoi që në fillim Gatuzon, sepse ai ishte pikërisht lloji i lojtarit që trajneri na kishte kërkuar që në fillim. Tani e ka ai në dorë skemën dhe lojtarët, por në organikë nuk mungojnë alternativat cilësore në të gjitha rolet.
Si është të punosh me Paolo Maldinin?
Ne plotësojmë njëri-tjetrin, pasim kemi histori dhe karakteristika të ndryshme. Jemi miq dhe kolegë shumë të bashkuar, ndaj mendoj se pika jonë e fortë është respekti dhe admirimi ndaj njëri-tjetrit. Mendoni se Juventusi niset përsëri si favorit absolut? Jo, nuk është e sigurt. Ciklet përfundojnë një ditë dhe Juvja do të jetë e përqendruar te Champions-i. Ekipet e tjera janë përforcuar shumë, sidomos Interi dhe Roma, por edhe Ançeloti është një armë plus për Napolin. Do të jetë një betejë e bukur dhe e ashpër.
Cili ishte akordi më i vështirë nga këto që keni përfunduar? Të gjithë kanë qenë të komplikuar, por më shumë ai me Juven, pasi përfshiheshin dy klube dhe tre futbollistë. Në këtë kuadër më duhet të falënderoj klubet me të cilët punuam, pasi çdo bisedë u zhvillua në një klimë respekti dhe tejet të qetë.