Zhgënjen Luftëtari, Kastrioti feston me tri pikë në Gjirokastër
Një gol me penallti i Mziut u jep tri pikë të arta krutanëve
Luftëtari i zhgënjen të gjithë, ndërsa Kas trioti është surpriza e bukur e javës së parë të Kategorisë Superiore. Krutanët rikthehen në elitë, duke marrë tri pikë që në start në një prej fushave më të vështira të kampionatit. Eliminimi me turp në Ligën e Europës kishte lënë shenjë te gjirokastritët, të cilët edhe pse zhvilluan relativisht një pjesë të parë të mirë, u dorëzuan totalisht në të dytën. Një shpërfytyrim i pashpjegueshëm, kur shikon se qendërmbrojtësit bëjnë gabime amatoreske, ndërsa skuadra s'ka forcë të dalë në sulm për të rrezikuar. Pa treshen e artë të sezonit të kaluarA Abazaj, Bregu dhe Rroca, me dy të parët të larguar dhe fantazistin e dëmtuar, pritej që Luftëtari të mos kishte atë shkëlqim, mirëpo në kampin bluzi para ndeshjes fitorja ndaj Kastriotit nuk diskutohej. Gjithsesi, në fund fitoi taktika e trajnerit Elvis Plori, i cili me zgjedhjet e tij e befasoi ekipin bluzi në pjesën e dytë. Një triumf i merituar i krutanëve, që u larguan nga qyteti i gurtë duke marrë duartrokitjet e tifozëve gjirokastritët, të cilët kontestuan trajnerin Millosh Kostiç.
PJESA E PARË - Luftëtari e nis me formacionin "tip" që prezantoi edhe në Europë, ku mungesa e madhe ishin mbrojtësi Jakovljeviç dhe fantazisti Rroca. Që në start, Kastrioti vendoset në pozita pritjeje, me Plorin që kishte rreshtuar një mesfushë të ngjeshur dhe me Taulant Markun në sulm. Bluzinjtë mundohen të qarkullojnë topin, por mungon rrezikshmëria në portën krutane. Mbrojtësit e krahut, Liçaj dhe Ehekson, mbështesin skuadrën me daljet në fundore, por për të parë raste të arta për gol duhen pritur 30 minuta. Donald Rrapo ka shansin të kalojë në avantazh Luftëtarin, por i vetëm me portierin shpërdoron fatalisht. Më pas është Shkurtaj që i afrohet golit, me pjesën e parë që mbyllet 0-0.
PJESA E DYTË - Skuadrat e nisin me të njëjtat formacione, por këtë herë ndryshon taktika e Kastriotit. Miqtë janë më kërkues dhe ushtrojnë presing lart, duke bllokuar totalisht në mesfushë dyshen Aleksi-Ramadani. Luftëtari humbet qarkullimin e topit, por edhe freskinë fizike që kishte në raport me kundërshtarin. Rapa nuk është në një ditë të mirë dhe bën gabime të njëpasnjëshme, kryesisht në
mbajtjen e tepruar të topit. Kastrioti i afrohet golit me Gutrën nga goditja e dënimit, por Ruçi bën mrekullinë. Patrik Bardhi dhe Aleksandros Rahim dalin në pah mbi të gjithë te krutanët. Nga një kundërsulm vjen edhe episodi që vendosi ndeshjen, teksa
Janiçiç pengoi brenda zonës Bardhin. Gjyqtari Myrtja akordoi 11-metërsh dhe nga pika e bardhë shënoi Mziu. Më pas, krutanët administruan mirë takimin, duke mos i lënë hapësira Luftëtarit, që me Shkurtajn dhe Milosavljev, nuk arriti të barazonte.