+ika në ankth, e ardhmja e titullarëve e pasigurt
Vllaznia ka nisur punën për sezonin e ri, por me një grup të pakompletuar. Ishte vetë Hasan Lika që deklaroi për gazetën se i duhen lojtarë për mbrojtjen dhe sulmin, por jo vetëm. Ai theksoi se jo të gjithë futbollistët që kuqeblutë kanë momentalisht në dispozicion mund të quhen pjesë e ekipit. Dhe këtu nuk flasim vetëm për ata që do i përfshihen seleksionimit, por edhe titullarët që mbyllën sezonin e fundit. Asnjë prej tyre nuk është ulur me drejtuesit e klubit për të folur rreth së ardhmes. Gilman Lika, AlsidTafili, Florian Bardulla, Ardit Krymi, Olsi Gocaj, Antonio Marku e Erind Selimaj, edhe pse janë duke u stërvitur me kuqeblutë, nuk janë zyrtarizuar. Duke qenë se pagat e tyre kanë qenë realisht të larta vjet, pritet që të ketë rishikim të termave financiarë. Klubi ka qenë i prerë në këtë drejtim dhe pritet që të ulë ndjeshëm rrogat. Kjo do të thotë që me të gjithë do të ketë negociata për rishikim të kontratave. Megjithatë, paratë nuk e vetmja pengesë. Rasti konkret vlen për kapitenin Gilman Lika, i cili pret që Vllaznia të ndërtojë edhe një skuadër kompetitive. Është pikërisht ky kushti që do e mbante në Shkodër mesfushorin. Të gjithë këta lojtarë kanë pranuar që do të kontribuojnë të kthejnë ekipin në elitë, por kjo nuk varet me sa duket tërësisht prej tyre. Ajo që mund t'i bëjë këta lojtarë që të jenë të lirë, është pikërisht aspekti financiar. Pagat e tyre mujore do të kenë ulje të konsiderueshme dhe kjo mund të sjellë edhe pakënaqësi dhe rrjedhimisht largime. Do të jenë takimet e shumëpritura me drejtuesit më të lartë të klubit, që do të vendosin gjithçka. Largime të tilla mund të sjellin të tjera shqetësime për trajnerin që, me sa duket, tani "hesapet" po i bën me lojtarët që ka në dispozicion. Vetë lojtarët, por edhe Hasan Lika, presin që të nisin negociatat për kontratat, pasi ky hap do u japë siguri për sezonin e ri.