Problem në zemër, Striniç rrezikon sezonin
Lajme të këqija për Ivan Striniç. Nënkampioni i botës me Kroacinë ka zhvilluar dje një seri testesh mjekësore, një rutinë kjo për klubet profesioniste. Në bazë të rezultateve të marra nga "Milan Lab", ka rezultuar se 31-vjeçari ka një problem kardiak. Në komunikatën e klubit kuqezi thuhej shprehimisht se: "Gjatë analizave mjekësore të futbollistit Ivan Striniç, u vu re një ipertrofi në një nga muskujt kardiakë. Si pasojë e këtij konstatimi, lojtari ndërpret përkohësisht çdo aktivitet sportiv". Burime pranë kuqezinjve bëjnë të ditur se Striniç do të zhvillojë një seri testesh të reja, në bazë të së cilave do të përcaktohet terapia për kurimin e problemit të tij. Për arsye sigurie, mbrojtësi është i detyruar të ndërpresë çdo aktivitet agonistik deri në përfundim të analizave dhe terapive për t'u ndjekur. Nuk dihet ende nëse problemi do t'i kushtojë sezonin kroatit, i cili ishte një ndër afrimet e para të Milanit gjatë merkatos që sapo u mbyll, i ardhur me parametër zero nga Sampdoria.