Bilanc financiar negativ, por me Champions-in…

Një merkato për notë 9 (10 nëse do ishte marrë Modriç) ajo e Interit. Po çfarë impakti ka pasur seksioni veror në llogaritë e klubit zikaltër? Kësaj pyetjeje, i është përgjigjur "Calcio &Finanza", portali i specializuar në temat ekonomike të lidhura me futbollin. U afruan 7 lojtarë: Naingolan, Martinez, Vrslaiko, Politano, De Vraj, Azamoah e Keita, përveç të riut Salsedo dhe pagesës së Federiko Dimarkos. Ndërsa shitjet, jo të gjitha të llogaritshme në këtë bilanc (disa u kryen përpara 30 qershorit), janë 14: Kondogbia, Santon, Valieti, Betela, Eder, Karraro, Odgard, Zaniolo, Nagatomo, Biabiani, Radu, Pushkas, Bardi e Pinamonti. Një numër që, së paku në letër, mund të rritet akoma, duke konsideruar faktin që disa merkato, si në Spanjë, Gjermani e Francë, janë të hapur deri më 31 gusht (po kërkohet, në fakt, një sistemim për Zhoao Marion).

BLERJET - Nga blerjet e mësipërme, tri u kryen me pagesë të menjëhershme (jo me huazim): Naingolan, i paguar 38 milionë euro (në marrëveshjen që transferoi Zaniolon e Santonin te verdhekuqtë), Lautaro Mardinez (16 milionë euro) dhe Dimarko (nga Sioni). Dy afrime me parametër zero (De Vraj e Azamoah), ndërsa tre janë huazime: Politano (7 u paguan për huazimin, 20 të tjera nëse do blihet), Vrsaliko (6.5, 16.5) dhe Keita (5, 34). Operacionet në hyrje, mes kostos së huazimeve, blerjeve dhe pagave bruto, kanë një peshë prej 71 milionë eurosh. Që do mund të lehtësohen nga operacionet në dalje. SHITJET - Pjesa më e madhe e shitjeve të Interit u krye përpara 30 qershorit 2018, pasi plusvalencat ishte e nevojshme të përfshiheshin në bilancin e 2018-ës. Megjithatë, një pjesë e efekteve pozitive në nivel kontabiliteti do mund të verifikohen në bilancin e 30 qershorit 2019, si për shembull kursimi i pagës: pritet një impakt pozitiv prej rreth 27.5 milionë eurosh (ndërsa për sa u takon plusvalencave të realizuara brenda 30 qershorit 2018, klubi zikaltër arkëtoi rreth 35.2 milionë). Mes blerjeve dhe shitjeve, pra, impakti në bilancin 2018-2019 është rreth 43.5 milionë në negativ. Deficit që mund të barazohet, megjithatë, nga rritja e fitimeve të parashikuara nga pjesëmarrja në Ligën e Kampioneve dhe nga të drejtat televizive.