Levandovski shpëton Bajernin nga turpërimi
Nojer shpëton kampionët, frikë që në turin e parë
Bajerni luajti dje ndaj Drohtersen ndeshjen e parë të Kupës së Gjermanisë. Skuadra e Niko Kovaç zhvilloi një ndeshje për t'u harruar, edhe pse arriti të kualifikohej për turin e ardhshëm. Bajerni luajti me formacionin e tij më të mirë përballë një kundërshtari që militon në kategorinë e katërt në Gjermani. Ndeshja përfundoi 0- 1 falë golit të Robert Levanovskit që, ashtu si në ndeshjen e fundit në Superkupë, shënoi për kampionët e Gjermanisë.
PJESA E PARË Ndeshja nis e avashtë me skuadrat që studiojnë njëra- tjetrën. Atmosfera në stadium është elektrizuese, tifozët vendës kishin mbushur përtej kapacitetit stadiumin e tyre. Bajerni mundohet të organizohet, por nuk ka freskinë e duhur për të shtyrë përpara. Rasti më i mirë shënohet në minutën e 33- të, kur Florian Nagel godet në brendësi të zonës së bavarezëve, por portieri Nojer bën mrekullinë duke shmangur një gol të sigurt. Bajerni kundërpërgjigjet me Myler, por sulmuesi godet shumë larg portës së mbrojtur nga portieri Zifkes. Pjesa e parë përfundon në shifra të barabarta 0- 0. PJESA E DYTË Trajneri Kovaç fut në lojë Goreckën për Humels dhe Koman për Robenin, që duhet thënë se ishte në hije gjatë gjithë pjesës së parë. Tiago shkon afër golit, por topi i goditur prej tij ndalet në shtyllën e portierit vendës që ishte i pashpresë. Bajerni zgjohet dhe kërkon të shënojë golin e fitores për të shmangur një turpërim të mundshëm në Kupën e Gjermanisë. Në minutën e 79- të Myler shënon, por goli anulohet për pozicion jashtë loje. Goli nuk vonon dhe në të 82- ën Robert Levanovski shënon pas një topi të kthyer nga portieri Zifke, që nuk kontrollon siç duhet topin e goditur nga Gorecka. 7 minutat shtesë nuk sjellin asnjë ndryshim dhe loja përfundon me rezultatin e ngushtë 0- 1 për kampionët e Gjermanisë, të cilët kalojnë në turin e dytë.