Kovaç: Luajtëm dobët, komplimente kundërshtarit
Trajneri i Bajernit, Niko Kovaç, ka qenë shumë i zhgënjyer pas ndeshjes në Kupën e Gjermanisë, edhe pse bavarezët fituan falë golit të Levandovskit në minutën e 82- të. Kampionët vuajtën jo pak dhe ndeshja mund të kishte marrë një rrjedhë tjetër nëse vendësit do të kishin shënuar në pjesën e parë, kur Nagel ishte shumë pranë golit, por portieri Nojer bën mrekullinë. Kovaç priste më shumë, por skuadra nuk iu përgjigj ashtu si priste trajneri kroat që nuk kurseu edhe fjalët e mira për skuadrën kundërshtare. "Ishte një takim i vështirë, kjo ndodh gjithmonë në raundet e para të Kupës. Nuk donim të eliminoheshim, edhe pse sot ( dje) morëm një paralajmërim për ndeshjet e radhës që në presin në këtë kompeticion. Kemi akoma shumë punë dhe duhet të vazhdojmë të përmirësohe- mi, pasi zhvilluam një lojë jo të mirë", u shpreh trajneri, që më pas nuk harron të komplimentojë edhe paraqitjen e kundërshtarit, i cili arriti të vinte në vështirësi kampionët. "Dua të komplimentoj Drohteserin që luajti shumë mirë, ata treguan shpirt gare
të madhe dhe pasion përballë tifozerisë së tyre", përfundoi Kovaç. Bajerni do të luajë ndeshjen e radhës ndaj Hofenhaimit për kampionat ditën e premte. Kampionët do të mundohen të mbrojnë titullin e fituar sezonin e fundit.