Tare: Kampionati shqiptar nuk shikohet pas janarit
"Strakosha vlen 81 milionë euro, ja ku bazohem te përzgjedhja për afrimin e lojtarëve"
Drejtori sportiv i Lacios, Igli Tare, i cilësuar si një nga më të mirët në Serinë A, në një intervistë dje në mbrëmje për "Zona Gol" në "Supersport", foli për filozofinë e klubit të tij dhe për afrimin e lojtarëve shqiptarë. Në fund ai nuk ngurroi të jepte një mendim edhe për kampionatin shqiptar. "Drejtori sportiv është një profesion që të jep shumë, por të merr edhe shumë. Kam arritur një ekseperiencë të madhe, por jeta është e tillë që dua të mësoj diçka të re çdo ditë. Unë kam disa parametra që janë shumë të rëndësishëm, për nivelet e larta. Lojtarët që përzgjidhen, duhet të interpretojnë disa pozicione dhe role. Për sa i përket skuadrës, skuadra duhet të ketë një filozofi fituese, por nuk është e lehtë, sepse edhe mënyra e interpretimit që kemi ne si skuadër, është se shënojmë shumë, por edhe pësojmë shumë. Lacio është e vetmja skuadër që luan me tre mbrojtës tipik dhe me 2 anësorë shumë ofensivë. Me karakteristikat e lojtarëve që kemi, kur rikuperojmë topin, dalim shumë shpejt në kundërsulm. Raporti im me Lacion është shumë i thellë, sepse kam shumë vite, si futbollist dhe drejtues. Edhe vetë, ia bëj vetes këtë lloj pyetje. Kam pasur shumë oferta nga kampionate të rëndësishëm, por nuk e kam menduar ta bëj këtë hap në karrierë, por në të nesërmen, pse jo. Ka pasur oferta nga klube angleze dhe gjermane, jo vetëm italiane", - deklaroi Tare. I pyetur nëse do t'i pëlqente të drejtonte një klub ku nuk mungojnë milionat apo në një që nuk shpenzon shumë, ai shtoi: "Kam provuar variantin e dytë. Nuk di të them kush është më e mira. Lotito është numri 1 në Itali për menaxhimin e një klubi. Çdo problem e kemi kaluar bashkë. Kemi shlyer të gjitha borxhet, kemi mbajtur skuadrën në nivel kompetitiv,
duke rritur cilësinë e klubi. Merita është e tij". I pyetur sa vlen Thomas Strakosha, ai tha: "Nëse Alison u shit 80 milion euro, Strakosha vjen 81 milionë euro". Ndërsa për Hysajn bëri këtë koment: "Doja të shikoja atë lojë që shfaq te Napoli me Kombëtaren".
KAMPIONATI - "Superligën e ndjek me shumë vëmendjen. Jam kritik, pasi janë bërë hapa përpara për infrastrukturën, por ka mbetur i njëjti mentalitet i viteve të shkuara. Nuk e shoh më, pasi nga janari e më pas vendoset nëpër tavolina. Dhe kjo nuk më ka pëlqyer asnjëherë".