Kovaç: Për mua Boateng nuk largohet
Trajneri kroat kërkon qëndrimin e mbrojtësit
Trajneri i Bajernit të Mynihut, Niko Kovaç, shpreson që mbrojtësi Zherom Boateng të mos largohet nga skuadra bavareze në merkaton e verës dhe të vazhdojë të luajë për kampionët e Bundesligës edhe në sezonin e ri që fillon të premten e ardhshme. Mbrojtësi 29-vjeçar ka ngjallur interesin e mjaft skuadrave të mëdha në Europë, si Mançester Junajtid dhe Parisi. PSG është në "pole" për ta marrë atë, por trajneri Kovaç mund të ndalë këtë transferim. Trajneri i ka dhënë besim lojtarit, që u aktivizua 90 minuta në fitoren 1-0 që Bajerni arriti me vështirësi në Kupën e Gjermanisë ndaj amatorëve të Drohtersen/Asel. "Unë shpresoj që deri në fund të merkatos të mos ndodhë asgjë. Kjo do të më kënaqte, pasi do të mbaja në ekip të gjithë lojtarët që kam në dispozicion. Kampionati është i gjatë dhe çdokush është i rëndësishëm. Unë besoj se Boateng do të jetë me ne në shtator, nuk ka për t'u larguar. Është një lojtar i rëndësishëm për ne, ka përvojë të madhe dhe është një lider në fushën e lojës. Shumë pak mbrojtës janë në nivelin e tij", u shpreh Niko Kovaç, që beson te mbrojtësi i kombëtares gjermane. Kohët e fundit kanë qarkulluar zëra se pas 7 sezonesh, Boateng mund të largohet nga Bajerni i Mynihut, por deri më tani nuk ka ardhur asnjë ofertë konkrete në adresë të mbrojtësit 29-vjeçar. Ai shumë herë është shprehur edhe vetë se nuk do të përjashtonte një largim të mundshëm nga Mynihu në fund të sezonit, pasi dëshiron të provojë një aventurë të re në karrierën e tij.