Liverpuli nuk fal, dëbon një serb për... Shaqirin
Çështja serbo-kosovare në klub, dëbohet në huazim Grujiç
Liverpuli duket e vet mja skuadër që të paktën në këtë fillimkampionati mund të mbajë ritmin e Mançester Sitit. Pas suksesit 4-0 në debutimin e bërë javën e kaluar në Premier Ligë, ku asfaltuan kundërshtarët e Uest Hemit, edhe mbrëmjen e djeshme skuadra e Jurgen Klop nuk ka gabuar. Edhe në transfertë përballë Kristal Palasit, takimi ka qenë i njëanshëm, me lojtarët e trajnerit gjerman, të cilët kanë dominuar lojën dhe në fund fituan 2-0. Edhe pse rastet për shënim dhe intensiteti i lojës së Liverpulit ka qenë shumë i lartë, zhbllokimi i sfidës ka ardhur vetëm në sekondat e fundit të pjesës së parë. Autori i golit ishte Xhejms Milner, i cili u tregua i ftohtë dhe i saktë nga pika e bardhë e penalltisë, pasi ishte Mohamed Salah që e pati fituar atë. Ajo e djeshmja ishte një penallti historike për anglezin, i cili është bërë lojtari i parë në historinë e Premier Ligës që shënon tetë gola të njëpasnjëshëm nga pika e bardhë. Në fraksionin e dytë të lojës, edhe pse vendësit tentuan në barazonin takimin, duke parë se Liverpuli nuk po shënonte golin që do të mbyllte ndeshjen, Kristal Palas mendoi që të vetëvritej, teksa në minutën e 75- të Bisaka meritoi kartonin e kuq dhe la me 10 lojtarë të tijtë. Ndërkohë që në minutën e 93-të erdhi edhe goli i mrekullueshëm i Manesë, i cili i dha fund ndeshjes së djeshme. Çështja Serbi-Kosovë Xherdan Shaqiri është një nga lojtarët që trajneri Jurgen Klop e kërkoi te Liverpuli gjatë kësaj vere dhe klubi ia plotësoi këtë dëshirë. Megjithatë, ardhja e futbollistit kosovar në "Anfield Road" nuk i ka pëlqyer lojtarit serb, Marko Grujiç, me 22-vjeçarin që ka bërë një gjest, i cili nuk u ka shpëtuar tifozëve dhe drejtuesve të kuq. Ai i ka dhënë "like" një postimi ku thuhej se Kosova është pjesë e Serbisë dhe se festimi i
Shaqirit me shqiponjë pas golit që i shënoi serbëve në Botëror duhet të hiqet, duke qenë se gjeste të tilla nuk kanë të bëjnë absolutisht me sportin. Madje, gjesti i shqiponjës nuk e bënte atë një person pozitiv. Dhe për të larguar mosmarrëveshjet në ekip, drejtuesit kanë marrë vendimin që të konfirmojnë bindshëm kosovarin Shaqiri dhe e kanë larguar lojtarin serb në formë huazimi drejt Hertës së Berlinit, në Bundesligën gjermane.